خطوط مصارحة الحبيب / درنفيسيات

$%R- مو كافي مكضيها نظرات ؟؟ الى متى رح تظل تبصبص عليها ومتروح تحجي وياها؟ لك بابا شناقصك بس كلي؟ البنية رح تخلص من ورة النظرات ، دروووووح احجي وياها من دفرة بأمعائك الدقيقة
مو ذبحتني
وصلنة للفاينل والتمثال الي بالقسم يتحرك وانت ماتتحرك

*!Q- لك شحجي وياها بس فهمني ؟ هو غير اعرف شحجي وياها ؟ وشلون افوتلها اصلاً ؟
هي صح تباوعلي واحس انه اكو اعجاب ، بس ما ضامن روحتي الها رح تجيب نتيجة !
ثانياً ... يا حجي الي احضره ، احس بنفسي انساه واني يمها ، مرة جربت اروحلها ، وبنص الطريق ، ما اسولفلك
رجلي اشتغل بيها الفايبريشن
بطني طلعت مظاهرات
كلبي يدك بطريقة تأهله ان يفتح محل مال مزيقة اعراس
وبالف ياعلي وصلتلها ، النوب كاعدة يم بنات ثنين يا الله ، فمكدرت اسوي شي
سألتها عن الوقت وانهزمت

$%R- صح ، وشي طبيعي هذا ، تحس عبالك رايح للجبهة ، ولا عبالك مصارحة

*!Q- زين شلون هسه؟ لك خلصت السنة واني ماماخذ لارقم ولا فيس ولا طركاعة الله ، ورح تجي العطلة ، دحجي يمعود انت مو كومة مصارح ، شلون افوتلها خرب #^sdf$#

$%R- يضنااااية ، بالحضن يضناية بالحضن
شوية اهدأ ، واني هسه اسولفلك بس اريدك تركز وياية ها ، مو شلّه واعبر

*!Q- مركّز ، وحق مرگة الطرشانة والفسنجون مركّز ، بس احجي

$%R- شوف حبي ، العلم التجريبي دخل نفسه بهاي السالفة
ووجد بعض الحلول حول هالمشكلة الي انت بيها
مشكلة : كيف تفتح خطاً حوارياً مع شخص تشعر بالانجذاب له !!
شلووون يحلوها؟؟ جايك اغاتي
علماء من جامعة الاسكا الامريكية ، جابو 1000 شخص مابين ولد وبنية
وسألوا واحد واحد عن اسئلة همّ واضعيها مسبقاً
الاسئلة عبارة عن 3 خطوط حوارية ، اجي اسولفلكياهن

*!Q- اي سولف ونعله على الي ما يعزمك على غدة اذا صارت

$%R- الخط الاول : اسمه [الخط المُلتقط] هذا شنو سالفته ؟؟
هذا معناه ، انك تلتقط سالفة عند البنية ، وتروح تحجي بهالسالفة وياها
مثلاً : مرحبا ، أگلچ شغلة لاحظتها عليج ، ماركة الالبسة مالتج كلش نادرة انت مهتمة بالفاشن؟؟
او : مرحباً ، لاحظت مسألة واريد اكلج بيها ، شفتج بالمسرح ذاك اليوم ، شنو انتِ شاعرة ؟؟
هذا الخط الاول

الخط الثاني : اسمه [خط النهاية المفتوحة] هذا شنو النوب؟
هذا تسأل بي سؤال بريء نوعاً ما ، ويخليك تسترسل بالكلام وراها
مثلاً : مرحباً ، دا افكر بمسألة وحبيت اشاركج بيها .. شنو رايج بالموسيقى بشكل عام؟ هل تحسين بيها فد منفعة ؟
هذا السؤال كمثال ، مو تروح تسألها عالموسيقى !! هذا السؤال وصف للحوار الي بي نهاية المفتوحة
حتى تكدر تكمل

الخط الثالث : اسمه [خط الاقتراب المباشر] هذا شبي؟
هذا كلشي مابي ، لاسلام ولاكلام ، گبل وعدل ، تفوت عليها وتتعرف
مثلاً : هلو شلونج ، اني معجب بيچ واريد اتعرف عليج

*!Q- الخطوط تلاثتهن يشتغلن ، حلو ، اكدر اختار بكيفي يعني ؟

$%R- ماكو شي اسمه تختار بكيفك ، غير تعرف النتائج بالبداية !!
دماغ السنجاب
شوف
اظهرت الدراسة التالي :
- النساء تفضل الرجال الي يفتحون وياهن (خط الالتقاط) و (خط النهاية المفتوحة) كخطوط تبدي بيها الحوارية ، ويصير عدهم رد فعل سلبي من (خط الاقتراب المباشر)
حلو ؟ حلو
بس اكو فائدة ملموسة رصدوها الباحثين من [خط النهاية المفتوحة]
الا وهي ؟
الفائدة : هذا الخط يوفر سياق حوار اقل "تهديداً" وميثير رهبة چبيرة بداخل البنية ، لأن سياق هذا الخط مرن بعض الشيء ايها الحلزون العقيم
فعليكَ بهِ

*!Q- يا اخي ما اعرف شأكلك ، ألبي وشعر سدري راضين عليك

$%R- اوكف اجتني فكرة اقوى !!

*!Q- شنيّة؟ احجي بسرعة ترى اني تعربنت

$%R- ليش متروحلها وانت شايل بيدك هالمصدرين الملبلبات ؟؟ عيب تروح وايدك فارغة grin emoticon

http://www.businessinsider.com/how-to-start-a-conversation-…
http://link.springer.com/article/10.1007/BF00288216…