الجمعة، 3 يوليو 2015

وهم التفوق / درنفيسيات



@$- دماغك يفرز مادة مخاطية تخلي افكارك لزجة بعض الشيء
=شلون ؟
@$-يعني من مجلب بهاي السوالف العلمية والادلة وال وال وال ، والواحد شيحجي وياك وكتله وين دليلك ، هاي الحذلقة متفيد ، دگمهن
=اوكي ، شلون تريد الواحد يواجه اي معلومة بهذا الزمن الغزير بمصادر المعلومات ؟
القضية مو قضية فذلكة ولا استذكاء، هي مجرد تحكيم العقل بكل شي نشوفه بحياتنه ، هل يكون قابل للتصديق او لا ! مو اسمعلي معلومة من معمم واعتبرها نص غير قابل للتخطئة ، سولفها على عمتك هاي السالفة
@$-ولك انت توصللهم توصل لذيالهم ؟ ناس تعبانة على نفسها بالقراية والدراسة والسهر ، وانت تجي تحط راسك براسهم شنو ، اقرة الي قروه وبعدين تعال سولف
=باوع يا وجه الفقمة ، ياكرعان الزرافة ، اكو شي اثبتته التجارب العلمية والاحصائيات المختبرية اسمه [وهم التفوق] سامع بي ؟؟
@$-هههههههههه سامع بي او مسامع ، مرح تضيفلي شي
=هاي ضحكتك تدل على انك غبي ويلبسك وهم التفوق
@$-تعلمله جم حجاية واجه يبعهن عليه ، شو بله ابهرني بوهم التفوق !!
=هاي الجملة الثانية مال (تعلمله جم حجاية واجه يبعهن عليه) تدل على نقص حاد بأنزيمات هواية عندك تربك شخصيتك بهيج حواريات
وهم التفوق هو وهم يصاب بي من يعتنق فكرة ، هاي الفكرة تزرع بداخله جملة تمشي عليها حياته ، هاي الجملة شنو قالبها ؟ قالبها يكول : ان اعتنقتني فأنت تعرف من خلالي كل شيء
واكيد انت ملاحظ هاي المسألة ، ان كل معتنقي الأفكار الروحية (كالأديان) وما شابهها من ايديولوجيات ، دائماً يكولون : فكرتنا تجيب على كل شيء
والدليل انت ، تصدق كل مايصدر من رجال دينك على انه حقيقة مطلقة ومعلومة حيّة
@$-يعني هسه انت على اساس ماعندك وهم التفوق يادكتور فل
=الانسان الطبيعي يعرف بعض الامور ، وعالاكثر يدري بنفسه انه هو عنده معرفة جيدة "موهوب بيهة"
لكن اكو ناس، عبالهم انه هم كلشي يعرفون والي يُطلق عليهم مفردة اغبياء
بس هذولة "الاغبياء" اغبياء فعلياً؟
لا، وانما عدهم وهم "الكفاءة"
يعني عبالهم يعرفون كلشي
@$-ماكو غيركم مصاب بوهم التفوق انتو التحجون بالعلوم والمصادر
(شوفوني واني علموي)
= لاتحمى ، اكو عالم نفسي اسمه ديفد دوننگ
سوى تجربة
جاب طلاب يعتنقون افكار مختلفة ، وجمعهم بطريقة عشوائية ، وسوالهم اختبار على شكل صح وغلط
وبنهاية الاختبار خلاهم يقيمون نسبة معرفتهم بنفسهم ، يعني هل معرفتهم بنفسهم جيدة لو لاع ؟؟
شاف انه التناسب عكسي بين المعرفة الفعلية وبين وهم الكفاءة مال الطالب
يعني كلما كان مجاوب خطأ كلما توقع انه جوابه صح
وانت هيج ، عبالك بأعتناقك لفكرة معينة انه انت ملكت المعرفة الكليّة يا تشريب السحالي الافريقية
@$-ها مو كل ما انت شبيك شو بس .....
=على كيفك ، هاك هاي الحبشكلات ، شوفها ، وحاول تقراها بتمعّن ، وتعرف على وهم المعرفة ووهم التفوق
ووراها اعزمني على "دوندرمة" من مثلجات الطويرجاوي الفاخرة
مرسلة بواسطة في

ليست هناك تعليقات:

إرسال تعليق

الاشتراك في: تعليقات الرسالة (Atom)