متلازمة التحذلق اللغوي / درنفيسيات

%%^- هل تعلم بأن "الشِعرِ جميلُن" ؟؟

-= هسه شلون تريد اجاوبك على هالسؤال وانت املائك غلط والنحو مال الجملة مالتك هم غلط ... الجملة المفروض تصير "هل تعلم بأن الشعرَ جميلٌ"؟
تعلم الاملاء وليدي

%%^- انت افتهمتها للجملة اول ما كتبتلكياها لو لا ؟؟ يعني فتهمت شريد اكول؟؟ ردت اكول يابه ترة الشعر حلو

-= اي افتهمتها طبعاً شيرادلها قابل ؟ بس ميصير تغلط باللغة بابا عيب

%%^- ليش شنو اللغة حتى الواحد ميغلط بيها؟؟ دستور اممي ؟ لو قالب سماوي رصين؟ ،، اللغة هي مجرد وسيلة تواصل لا اكثر ، وبما انه انت افتهمت قصدي من سألتك ، معناها طريقة التواصل نجحت ، فماكو داعي تنقض عليه

-= شنو هالحجي بابا ، يعني اذا تريد تكتب كتاب او تنشر مقالة بمكان ما ، فمعناها لازم تخطأ باللغة والله شنو انت وصلت المعلومة ؟؟
ماكو هيج بطة تلعب Mortal Kombat ، لازم تكون دقيق بكلشي

%%^- اها ، عاشت ايدك ، بس اني هنا يعم النحوي واللغوي بالفيس بوك
لاكاتب بجريدة ولا ناوي انشر بمجلة علمية او ادبية ، فعادي يعني الخطأ والسهو مرجوع للطرفين ، اما اذا كتبت كتاب او مقال ، فاكيد رح يوجد سلسلة من المصححين اللغويين

-= لازم تكون دقيق بكل حرف تكتبه ، هاي لغة مو لعب چعاب ، سواء بالفيس او غير مكان

%%^- مريض ، وحگ شكو فقمة تعيش بالقطب الشمالي مريض

-= تكلي مريض بس لان كتلك عندك اخطاء املائية ونحوية؟؟ صدك انت مو مال احترام لعد ، روح خل يضحكون عليك العالم

%%^- لاوحگ هو سوبر ماريو مو اني اكول عليك مريض ، هذا الطب النفسي الحديث يكول عليك مريض

-= شيكول الطب النفسي ؟

%%^- يكول : الي يدققون ورة املاء الاخرين بعيداً عن مهنتهم كمصححين لغويين ، هذولة بيهم متلازمة نفسية اسمها (متلازمة التحذلق اللغوي) او (متلازمة التصحيح اللغوي)
هاي المتلازمة هي عبارة عن خلل بالجينوم الخاص بالشخص المهووس بالتصحيح اللغوي ، بس يله سهلة ، هاي ولا غير شي

-= وشلون هسه ؟

%%^- يله مشّي ، ما الذنبُ ذنبكَ بل كانت الجيناتا

-= المفروض تكول الجيناتُ

%%^- رجعنا؟؟ دهاك

http://www.adobonews.com/…/grammatical-pedantry-syndrome.ht…
http://www.urbandictionary.com/define.php…
https://illinois.edu/blog/view/25/76120

هل تغير قراءة الروايات من عمل دماغك؟؟ / درنفيسيات

تقرا روايات؟؟
تقرين روايات؟؟

والله والنعم ، عاشت ايدكم
بقرائتكم لأي رواية (بأستثناء بنت مستغانمي طبعاً) جاي تحفزون الدماغ على ان يكون اكثر فاعلية بالتفكير ، وان تكونون خلّاقين في مجالكم المهني

يعني مثلاً ، انت حدّاد ، تقرا رواية ... اكو مناطق بدماغك رح تشتغل وتوفرلك افكار جديدة وخيالات واسعة على كيفية صناعة شبابيك بكلفة اقل وبتصميم رائع

انت متشتغل اصلاً ، وتقرا روايات ، رح ينشط دماغك فكرياً ، وهذا النشاط يوفرلك مساحة كافية لأنشاء افكار تخليك تطلع من كعدة البيت وتتجه للعمل الي وفره الك دماغك نتيجة القراءات
ووووو الكثير من الامثلة

بس هاي السوالف منين بعد عمك ؟؟

والله مولاي هاي السوالف من دراسات اجروها باحثين بعلم الاعصاب والدماغ
يشتغلون بجامعة ايموري الامريكية ، هذولة رادوا يعرفون تأثير الروايات على العقل فجابو متطوعين "لاعلى التعيين"
وانطوهم رواية يقروها
بس قبل لا يبدون المتطوعين بقراءة الروايات

خلوهم على جهاز مسح ضوئي اسمه " fMRI" ويعني [الرنين المغناطيسي الوظيفي]
من خلال هذا الجهاز كدروا يعرفون النشاط الدماغي مالتهم
سجلوا البيانات ، وبدت التجربة

بعد 5 ايام ، وبعد ما المتطوعين اكملوا قراءة الرواية ، هم خلوهم على الماسح المغناطيسي لقياس نشاطهم الدماغي
لگو الباحثين زيادة ملحوظة بنشاط الدماغ ، وهاي الزيادة صار الها تأثير على بقية الوظائف المسؤول عنها الدماغ
بحيث بدو المتطوعين يسألون اسئلة تنم على تركيز حاد ، بالاضافة الى وجود ارتياح نفسي ناتج عن كسب مفردات جديدة تضاف الى قاموسهم اللغوي والكثير الكثير من الفعاليات الي تأثر

ها؟؟ شلونها الروايات هسه ؟
رح تقروها لو نبقى نقرا كتب لاتغني ولا تسمن من جوع؟؟

http://www.wired.com/…/reading-a-novel-alters-brain-connec…/
http://www.latimes.com/…/la-et-jc-reading-a-novel-makes-mus…
http://www.forbes.com/…/for-a-better-brain-a-plan-to-feed-…/
http://www.upi.com/…/Reading-a-good-boo…/UPI-49281388778436/

حقائق عن مشروب البيرة / درنفيسيات

صديقاتي الي يحبون مشروب البيرة
اصدقائي الي يحبون مشروب البيرة
هاي 15 معلومة تتعلق بمشروبكم المفضّل ، ويمكن متعرفوها

1- اقدم وصفة لصناعة البيرة ترجع للعام 4000 قبل الميلاد ، واول من صنعها هم السومريين ((اصحاب كيف من يومنا وسبع تيامنا))

2- الفراعنة چانو ينطون للعمال مالتهم "گلن" واحد من البيرة ، والي يساوي 4 لترات
مقابل يوم واحد من العمل

3- اكو نوع من انواع البيرة تنصنع مو عن طريق الشعير ، بل عن طريق الموز
وهاي توجد بافريقيا

4- تعرض البيرة للضوء ، يسببلها رداءة بالطعم ، وخصوصاً اذا كانت باردة

5- البيرة والماريجوانا كلش مرتبطات بالمفعول مالتهن
لأن مادة "الهوب" الي موجودة بالبيرة ، هي مادة موجودة بنفس عائلة النباتات الي تنمي الها الماريجوانا

6- البيرة تساعد على منع امراض القلب وامراض التدهور المعرفي "مثل الزهايمر"

7- اكو نوع من انواع الفوبيا اسمه : سينوسيلكافوبيا ،، هاي شنو معناها ؟
معناها الخوف من رؤية كلاص البيرة فارغ

8- اقوى بيرة بالعالم تملك نسبة كحول = 67.5 %

9- في روسيا ، البيرة لاتعتبر مشروب كحولي اطلاقاً منذ 2013

10- اكو زلمة ، كضه 46 يوم بس يشرب بيرة ومي "سوادين"

11- علماء استراليين كدروا يصنعون بيرة مرطبة ومابيها اي اثر للسكر
يعني لا باربيكان ولا بيرة ، هيج مدري شنو

12- اكو بيرة على شكل "ايس كريم" وبيها كحول يكفي لان يمطلك بالكاع

13- بالفضاء الخارجي ، اكو سحابة كحول عملاقة بيها كحول نكدر نستخدمه لملئ 400 ترليون ترليون مكيال من البيرة "اعوزو بالله"

14- مدينة ببلجيكا ، اسمها Bruges ، هاي على طول وعرض مساحتها انابيب تنقل البيرة

15- سنة 2000 ، باستراليا ، طلعت مظاهرة كلش جبيرة ، وقدموا بيها الجماهير 792,985 توقيع ، من اجل شنو؟؟
من اجل تخفيض اسعار البيرة حتى تكون بتناول يد الجميع

http://www.unbelievable-facts.com/2015/05/beer-facts.html

حقائق علمية عن الحب / درنفيسيات

حبي مو ؟؟ ادري بيج تحبي بس انتِ لوتية
تحبها مو ؟ طبعاً تحبها ومزلّغ نفسك على مودها

وبمناسبة ان واحد يحب الثاني ، هاكم هاي المعلومات الحلوة عن الحب
"الحب دح دح ، والهجر كخ كخ"

1- بآخر دراسة تخص العشاق ، اتضح ان قلبيّ العشاق ينبضون في نفس الوقت
(ياعيني عالرومانسيكية)

2- من يخلون الدماغ على الاشعة المقطعية ، يظهر ان الوقوع بالحب يستحضر نفس البهجة الي تتلبس بالانسان الي يشربله جكارة مخدرات "الحب حالة حال المخدرات"

3- ابحاث علمية اثبتت ان الوقوع بالحب يقلل من انتاجية الفرد
وحق هي الفختاية صحيح ، شكد اعرف بنات وولد رسبوا بالجامعة من ورة هالحب
الاكشر ، واعرف شباب تعرقلوا بأعمالهم من ورة هالغضب

4- كل حب جديد ، من الممكن ان يسببلك فقدان صديقين من الاصدقاء المقربين
حسب دراسات من جامعة اوكسفورد

5- من توگع/ين بالحب ، تلقائياً ، المخ رح يطلق نفس الوصلات العصبية والهرمونات الي تنطلق من الفيتامينات (حاجة كويسة متخفوش)

6- يستغرق الوقت بين الـ 90 ثانية الى 4 دقائق ، حتى يتقرر ما اذا كنت تريد/ين هذا الشخص او لا

7- ضرورة الحب بالنسبة للانسان ، بالضبط مثل ضرورة الجنس والاكل والشرب والنوم

8- لمن نمارس الـ "احم احم" ، ترتفع مستويات عامل نمو الأعصاب المسمى (NGF)
وهذا شنو اصلاً ؟ هذا بروتين مهم للحفاظ على الجهاز العصبي المركزي من الازمات العصبية

9- اكو هواية انواع من الحب ، الاغريق مثلاً جان عدهم اربع الهة خاصين بالحب
ايروس "اله حب الجنس" ، اگابي "اله حب الخير" ، فيليا "اله الحب بين الاصدقاء"
ستورج "اله حب العائلة"

10- الزواج عن حب بدا ينتشر انتشار واسع بالقرن الثامن عشر
قبل هاي المدة جان الزواج التقليدي هو السائد

11- 23% من الكبلات الي بأمريكا ، الي تعارفوا عن طريق النت ، تزوجوا
"بركاتِك يست سلسلة"

12- البنت بالحب دائماً تبحث عن المغامرة ، اكثر من الرجل ، فأذا مارست الجنس وية الولد وحست بالامان ، فالدافع الجنسي عدها رح يهبط
(((هاي شلون سالفة ، يعني شنسوي مثلاً ؟ نكضيها مراد علم دار!!)))

13- سنة وحدة من الحب الرومانسي بين الولد والبنت ، كافي لان يحول هذا الحب الرومانسي الى (حب تعلّق)

14- حسب احصائيات عالمية ، اكو باليوم الواحد 3 ملايين موعد غرامي اول

15- هاي الجملة الي دائماً نكولها بالتعليقات او الرسائل بيناتنا (LOL) والي نعني بيها laughing out loud وترجمتها : ضحك بصوت عال
تدرون قبل لا يخربها الانترنيت شجانت؟؟ جانت Lots of Love
والتي تعني : المزيد من الحب

حب اييييه الي انتَ گاي تئول عليه تيرارارا

http://bit.ly/1S7mdax

حقائق عنالموسيقى / درنفيسيات

يعني هذا اليكره الموسيقى والي يمنعها شلون يترجم حياته ؟؟
ولو تدخل من عندي بحريات الاخرين ، بس ترى الموسيقى ترجمة من تراجم الجمال
الموسيقى والاغاني اعظم انتاج بشري

لكارهي الموسيقى ، هاي شوية معلومات اقروها ، بلكي شوية تتغير نظرتكم عنها

1- حسب دراسة ، تعلم العزف على آلة موسيقية ، يخليك تحسن من مهارات النطق والطلاقة اللسانية ، بالاضافة الى تحسين المهارات المنطقية بالحياة

2- توصف الموسيقى غالباً للمرضى المصابين بمتلازمة باركنسون والزهايمر والسكتة الدماغية وضحايا شلل الرعاش

3- استماعك للموسيقى اثناء ممارسة عمل ما (قراءة ، رياضة ، اي شغلة) يمكن ان تحسّن اداء هذا العمل بصورة كبيرة جداً

4- عزف الموسيقى ، يغير فعلياً من بنية الدماغ واليات الاستجابة

5- الدماغ يستجيب للموسيقى بنفس طريقة استجابته للأكل

6- الموسيقى تثير النشاط في نفس الجزء الموجود بالدماغ الي يطلق مادة الدوبامين ، والدوبامين بالعلم تسميته (مادة اللذّة) ، تنطلق اثناء الفرح واثناء الرعشة الجنسية

7- دگات كلبك تتغير تباعاً للموسيقى الي انت تسمعها

8- مرات ، تلزگ اغنية براسك ، وين متروح ترددها ومدتكدر تنساها
هاي السالفة الها تسمية ، وهي "earworm" ، معنى الكلمة هيج مثل الدودة الي كاعدة باذنك ومدتطلع

9- شايف مرات من تسمع اغنية او موسيقى وتوصل لفد مقطع وتكزبر؟؟
هاي الكزبرة هي نتاج اطلاق الدماغ لمادة الدوبامين ، وتنطلق من توصل لمقطع الذروة الخاص بالموسيقى او الاغنية ((شكد صايرة بيه))

10- ارتباطك العاطفي اله تأثير كبير جداً على اختيار اغنيتك المفضّلة

11- اكو عدد قليل من الانشطة الي يستخدمها الدماغ بالحياة ، والموسيقى احد هاي الانشطة

12- اختيارك للموسيقى "سعيدة كانت ام حزينة" ، يؤثر على نظرة الوادم الداير مدايرك

اطلقوا العنان لموسيقاكم

http://bit.ly/1AlhbkK

حقائق عالمية عن النساء / درنفيسيات

والله عدچن سوالف

46 معلومة قد لا تعرفونها عن انفسكن ، يلّه

1- كل 90 ثانية ، اكو امرأة تموت لو بسبب عملية الانجاب ، لو بسبب الحمل

2- 20% من نساء امريكا ، يكسبون ما لا يقل عن 5000 دولار اكثر من ازواجهم

3- اغنى 20 امرأة بالعالم ، اكو 3 بس كوّنوا ثروتهن بذراعهن وچدهن
اما الـ 17 الباقيات ، فثروتهن اجتي عن طريق ورث لو من الاب لو من الزوج

4- النسوان يحچن كمعدل باليوم الواحد 20 الف كلمة ، اما الرجال كمعدّل
فيحجون 7000 كلمة (لوك لوك لوك لوك)

5- النسوان بالحضارة الرومانية ، چانن يدهنن جسمهن بعرگ المحاربين
لأعتقادهم ان هذا العرگ ينطي نظارة وبريق لبشرتهن (ايع)

6- المرأة متوسطة الدخل داخل بيريطانيا ، تشتري 19 زوج من الاحذية
بس هي بالحقيقة تلبس بس 7

7- بروسيا، عدد النسوان يزيد على الزلم بمقدار 9 ملايين

8- 40% من حالات الانجاب الي تصير بأمريكا ، جاية من نسوان مامتزوجات

9- لو نجمع الوقت الي تدور بيه المرأة عن الهدوم الي تريد تلبسها ، فالزمن رح يطلع
سنة كاملة على طول عمرها

10- كمعدل ، المرأة تبچي بالسنة بنسبة بين 30 - 64 مرة
بينما الرجل كمعدل يبجي بنسبة بين 6 - 17 مرة

11- كمعدل ، الرجال يكذبون باليوم الواحد 6 كذبات
بينما النساء يكذبون 3 كذبات

12- اصغر مطلقة بالعالم ، هي بنت يمنية اسمها نجود علي ، عمرها 10 سنوات
تزوجت من شخص عمره 30 سنة وبعدين طلكها
"ماصار توافق فكري بينهم يعيني devil emoticon "

13- الرجال هم اول من ارتدى الكعب العالي منذ الـقرن السادس عشر
ووراها بدوا النسوان يقلدوهم حتى يبدون اكثر ذكورية

14- اسرائيل ، هو البلد الوحيد بالعالم الي ادرج المرأة بالخدمة العسكرية الالزامية

15- كمعدل ، نوبات الاصابة بآلآم الصدر والغثيان وعسر الهضم واوجاع الكتف
تكون بالنسوان اكثر

16- 40% من نسوان امريكا ، هنَّ الان حوامل

17- نبض النسوان نسبياً اسرع من نبض الرياجيل

18- سنة 2013 هي السنة الي نجحت بيها اول عملية زرع رحم لأمرأة ، وحبلت

19- اذا نجمع الوقت الي تقضيه المرأة وية دورتها الشهرية ، فراح يطلع 4 سنوات

20- النسوان عدهم براعم تذوق بلسانهم اكثر من الرجال

21- المرأة الي تشوخر بنومها اثناء الحمل ، اكثر عرضة لأنجاب اطفال "بُنيتهم" صغيرة

22- بعض النساء عدهم طفرة جينية تخليهم يميزون ملايين الالوان

23- المرأة الطويلة اكثر عرضة للأصابة بالسرطان

24- كمعدل ، المرأة ببريطانيا ، تشتري 111 جنطة خلال حياتها كلها

25- 30% من النسوان ، يتوحمن على منتجات مو غذائية

26- احصائية كبيرة ، تؤكد ان 40 الف امرأة في الولايات المتحدة ، لديها حساسية من السائل المنوي الذكري

27- من الممكن ان تحبل المرأة بعد 5 الى 8 ايام من ممارسة الجنس

28- اكثر عدد اطفال انولدوا من امرأة واحدة هو 69 طفل ((معمل الشخّاط هم مو هيج))

29- النسوان يفكرون بمظهرهن 9 مرات باليوم

30- اول مرة تم السماح للمرأة بالمساركة بدورة الالعاب الاولمبية كان سنة 1900

31- تعتبر امراض القلب هي العامل الاول بموت المرأة

32- حسب احصائية، 68% من النسوان كالوا ان هنَّ عدهن استعداد للخيانة بشرط ان ماينكشف امرهن (انا عايزة انحرف بس مش لائية الي يوجهني)

33- النسوان افضل من الزلم بالمهام المتعددة ، يكدرن يسيطرن على اكثر من مهمة بنفس الوقت

34- امرأة واحدة من كل 6 نساء ، وگعوا ضحية الاعتداء الجنسي بامريكا

35- حسب دراسات ، 2% من نساء العالم يوصفن نفسهن على انهنَّ جميلات

36- المرأة ترمش 19 مرة بالدقيقة الوحدة ، بينما الرجل يرمش 11 مرة

37- متوسط عدد اطفال المرأة النيجيرية هو 7 اطفال ، ويعتبر اعلى متوسط بالعالم

38- اكثر من 80% من نسوان العالم ، يلبسون ستيانات احجامها غير مطابقة وية حجم صدرهن (تهي بهي)

39- النسوان يعيشون اكثر من الزلم ، وهذا الشي يعود لقوة اجهزتهن المناعية

40- عدد التسريحات الي تسويها المرأة على طول حياتها هو 150 تسريحة
حسب احصائية كبيرة على نساء المملكة المتحدة

41- تجارب النسوان وية الكوابيس والاحلام العاطفية اكثر من الرجال

42- الكروش ما موجودة عند الرجال اكثر ، لا ، النسبة تقريباً متساوية بين النسوان والزلم ... وهذا الشي ينفي الاعتقاد الشائع الي يكول ان النسوان اكثر نحافة من الزلم

43- جامايكا وكولومبيا وسانت لوسيا هي الدول الوحيدة الي بيها دائماً تكون المرأة مديرة بالعمل

44- من 1920 الى بدايات عام 1930 ، هيمنت المرأة على كتابة السيناريو بهوليوود

45- 30% من المحلات التجارية بأمريكا ، يملكوها نسوان

46- بالصين ، النسوان الما متزوجات وهنَّ بعمر العشرين ، يطلقون عليهن تسمية (شنغ نو) وتعني : النساء المُهمَلات

http://bit.ly/1d9osC0

حقائق عن القُبلة "البوس لو صح التعبير" / درنفيسيات

%*- اگلچ ، انطيني بوسة

= يمعود ، شتسوي بيها ، دعوفني بحالي ، قابل شتفيد !!

%*- البوسة شتفيد؟؟ دهاج

1- البوسة من الحلگ لمدة دقيقة ، تحرگ سعرتين حراريتين

2- من ثنين يتباوسون ، راح يتم تبادل مابين 10 مليون الى 1 مليار بكتيريا بيناتهم
وغالياً ماتكون البكتيريا نافعة جداً

3- اذا جان واحد بي انفلاونزا ، فتقبيله افضل من مصافحته ، حتى تقل نسبة انتقال العدوى ، لان انتقال العدوى بالمصافحة اسرع بكثير من انتقالها بالبوس

4- بحوث طبية اثبتت ان البوس يشارك بتسوس الاسنان (حيل مو خوش)

5- اكو قبيلة ما ادري وين اسمها المانشو ، الامهات بهاي القبيلة ميبوسون اطفالهن
بس يبوسون (الاعضاء التناسلية مال اطفالهم) ، لان يعتبرون البوس امر جنسي فاضح (رب مال الشخوط هاي القبيلة)

6- اطول بوسة بتاريخ البشر ، استمرت لـ 58 ساعة و 35 دقيقة و 58 ثانية

7- اكو مفردة بالعلم اسمها [فيلماتولوجي] وتعني علم التقبيل ، يحلاوة

8- البوسة الفرنسية (لسان بلسان) الها مصطلح علمي وهو : cataglottism
وهي كلمة نادرة تعبر عن آلية التقبيل بأستخدام اللسان

9- اول مرة يتباوسون " 2 زلم " بشاشات التلفزيون كان عام 1927

10- متوسط الوقت الي يقضي الذكر او الانثى بالبوس على طول حياتهم ، هو اسبوعين ، يعني لو تجمع الوقت مال البوس على طول حياتهم يطلعن اسبوعين

11- ثلثين البشر ، يميلون براسهم على الجهة اليمنى من يتباوسون

12- بولاية نيفادا ، يعتبر من غير قانوني ان تكون ذكر وعندك شوارب وتبوس

= خوش معلومات ، هاك بوسة

%*- اي هذا الحچي

http://bit.ly/1KJlSFs

حقائق عن القلب / درنفيسيات

يمّه الگلب يمّه
خنسولف عالگلب شوية

1- كل يوم ، كلبك يحرر طاقة قيمتها تعادل سياقة تريلة لمسافة 32 كيلو متر

2- اذا فصلت گلبك عن جسدك ، فگلبك رح يبقى ينبض لفترة معينة ، لان الگلب يملك طاقة كهربائية خاصة بي هي الي تحركه

3- 75 ترليون خلية تستلم الدم من القلب ، ماعدى خلايا قرنية العين

4- ممارسة الجنس والوصول للذروة الجنسية 3 مرات بالاسبوع ، تخفض من امراض القلب التاجية

5- گلبك يضخ تقريباً مليون ونص لتر من الدم خلال حياتك كلها ، وهاي المليون ونص لتر ، تكفي لملئ 200 تريلة (قاطرة ومقطورة)

6- كلبك ينبض اكثر من 100 الف نبضة باليوم

7- تربية البزازين بالبيوت ، يحد من خطر الاصابة بالنوبات القلبية والسكتات الدماغية

8- الفيتامينات الصناعية تزيد من اصابة امراض القلب والسرطان

9- الرئة اليسرى مالتك اصغر من الرئة اليمنى، ليش؟ حتى تسوي غرفة لگلبك ويرتاح بعد بيتي

10- اكو رجل سووله عملية نقل قلب مال واحد منتحر ، هذا الرجل ، انتحر بنفس الطريقة الي انتحر بيها صاحب القلب الاصلي .... وبالمناسبة، هذا الرجال الثاني ، تزوج ارملة الاول ((ترى هاي حظها كلش مصخّم))

11- النباتيين اقل عرضة لان يموتون بأمراض القلب بنسبة 19% عن غيرهم

12- اكل الشوكولاته الداكنة كل يوم يقلل من اصابتك بأمراض القلب بنسبة الثلث

13- گلب الانسان مو عالجانب الايسر من الجسم ، بل هو في الوسط
عكس ما عرفناه (خرب عرضك العلم شكد مزحچ)

14- ثلث النوبات القلبية الي تجي للانسان اول مرة تكون قاتلة ، اما الباقي ، فيسوي اضرار للقلب

15- خطر التدخين يخلي الازمات القلبية تصعد من نسبة 200% الى 400%
عكس غير المدخنين ((هاي كلش مو خوش ، مكيسة حيل))

16- شايفين من واحد يوكف گلبه فجأة ويضغطون على كلبه ويسووله تنفس اصطناعي ؟؟ هاي بالطب يسموها "Stayin' Alive" ، وهاي الحالة تجدي نفعاً وتكون مثالية اذا الواحد سواها وية المريض الي هستوه صار بي سكتة قلبية

17- الناس الي تشتغل 11 ساعة يومياً ، ذولة معرضين للأزمات القلبية بنسبة 67%
وهاي النسبة اكثر من تعرض الناس الي تشتغل 8 ساعات يومية
((نريد فلوس يمعودين شنسوي))

http://bit.ly/1rlpp45

هرمون الجوع / درنفيسيات

&@#- لك جوعان ، رح اموت جوع ، هيج من الجوع مستعد الف القنفات مال البيت بالخبزة وآكلها

^%- ترى حيل عرضان ، على كيفك وية نفسك بالاكل ، شنو قابل طاير الاكل

&@#- لا مطاير بس ما اكدر اسيطر على نفسي ، يا اخي اذا وين ما اروح اشتم ريحة الاكل ، وتبدي بطني تعزف على اوتار الوجبات السريعة ، سيبني متكظنيش

^%- مادام هيج السالفة واصلة بيك ، اذاً عندك خلل بالهرمونات

&@#- هم هرمونات ؟ شطلعت هاي ، شنفتح سالفة وطلعتنه هرمونات بالموضوع
مو حجي هذا

^%- لعد شعبالك؟ هو شنو الانسان غير شورية هرمونات وانزيمات يخوطن بعضهن ويمشي اليوم ، ماكو شي يمشي الّا من خلالهن

&@#- وحب الاكل شعلي بالهرمونات يا اخي

^%- شلون شعليه؟ هي السالفة كلها برگبة الهرمونات
اول شي، انت عندك هرمونين رئيسيين هنّ الي يتحكمن بمسألة الشهية
الاول اسمه : الغريلين ، والثاني اسمه : الليبتين
الغريلين شنو شغله بالضبط؟ شغلة ان يفرز اشارت من المعدة ، هاي الاشارات تروح للدماغ ، وبعدين الدماغ يخليك تكول : اني جوعان

اما هرمون الليبتين فهذا شيسوي بعد خالك؟
هذا مسؤول عن موازنة مستوى الطاقة بالجسم ، ويساعد بتنظيم عمل هرمون الغريلين ، ورة متكمل اكل ، هرمون الليبتين يرسل اشارة للدماغ ويكلّه : هاهية ، قوّل الشحن وبعد ما احتاج اكل ، وورة ساعتين الى 3 ساعات يرجع مفعول الغريلين يشتغل

&@#- الربط وين وية حالتي ؟

^%- حياتي انت الربط وية حالتك هي ان الدماغ مالتك مديستجيب لهرمون الليبتين
ولذلك دتستمر تاكل ، والحل الوحيد حتى تخلي دماغك يستجيب لهرمون الغريلين هو ان تقلل نسبة الدهون بالاكل ليش؟؟

&@#- اي ليش بعد عمتك ؟

^%- شوف مولاي ، انت مو ينزل الاكل بجوفك؟ ورة ما تخلص اكل ، اكو اشارات رح توصل لدماغك وتكلّه يابه اني انمليت بالطاقة ، وبعد ما احتاج اي شي
بس من تاكل اطعمة بيها نسبة عالية من الدهون ، رح تصير بهاي الوصلات العصبية الي تنقل الاشارات للدماغ مثل "الزنجار" بحيث تعيق وصول المعلومة للدماغ وتبقى شهيتك مفتوحة للأكل ، وهذا الي راح يخليك تزيد السعرات الحرارية مالتك وتخزن دهون اكثر
فأنت بس قلل الدهون مبدئياً ، وشوف شلون رح تكون شهيتك "مغلوقة" وتكوم متحب الاكل

&@#- باع هذا يكلي عوف الدهون ، انت شايف من تطلع كبّة الحلب هستوها من الطاوة ووياها فد ماعون فنگر ؟؟

^%- انعل يومك ، كافي ، گمت اسلّچ ، وحلگي انترس حبشكلات

http://www.ncbi.nlm.nih.gov/pubmed/17212793
http://www.webmd.com/diet/your-hunger-hormones
http://www.news-medical.net/health/What-is-Ghrelin.aspx

معلومات علمية غريبة / درنفيسيات

20 معلومة عن العلم (كعلم) غريبة نوعاً ما
الجزء الاول

1- اول مرة تم استخدام مفردة "علماء" في البحوث والمراكز العلمية كان سنة 1833

2- متوسط قرّاء اي ورقة بحثية علمية بالعالم هو 0.6 من سكان الكوكب

3- العلم اخيراً كدر يفسر المعضلة الكونية الازلية الي وگع شعر حواجبنا من وراها
وهي : هل البيضة قبل الدجاجة ام الدجاجة قبل البيضة ، واستنتج العلم ان الدجاجة اجتي اولاً وبعدين البيضة ، لان من فحصو قشر البيضة لگو بي بروتين ما ينصنع الّا عن طريق جوف الدجاجة ، زغرطي ينشراح

4- العلماء يكتشفون 41 نوع من الكائنات الحية باليوم الواحد

5- [سفينوبالاتين گانگلينورالجيا] او [Sphenopalatine ganglioneuralgia]
شني هاي ؟ هاي مو مرات تاكل موطا او تشرب مي بارد بسرعة يصير عندك صداع حاد براسك؟؟ العلم يطلق على هذا الصداع تجمّد الدماغ ، وهذا التجمد يطلق عليه هذا المصطلح الفوگ

6- العلم انتج طريقة علمية يكدر من خلالها يحول اي سم بالعالم الى مسكنات آلآم
اكيد معظم طلاب الصيدلة يعرفون الطريقة ، الي اسمها 'toxineering'

7- علماء طوروا طريقة لشحن بطاريات الهواتف النقالة عن طريق البول
(هاي الاستخدامات مال البول يا ضفادع ، مو تشربووووووووووووو )

8- العلم يكدر يحول دهن الفول السوداني الى الماس ، لا يا حشّاشة

9- العلم طوّر مصل معين ، هذا المصل المادة مالته عبارة عن "مايكروبكتيريا"
هاي المايكروبكتيريا محقونة بكميات من الاوكسجين ، اذا حقنتها بجسم الانسان ونزلته بالمي، فكلش عادي رح يتنفس وهو داخل المي
بق بق بق بق بق

10- معامل الاحتكاك بين (الحذاء وگشر الموز والارضية) هو : 0.07

11- الزلازل تحوّل الماء الى ذهب ، آخر اكتشافات العلم

12- البرق الي يسبق صوت الرعد، درجة حرارته اعلى من درجة حرارة الشمس ب5 مرات

13- كحقيقة علمية ، اكل سمك السلمون يساعد بمقدار كبير على نمو الشعر بشكل سريع

14- يستغرق الكحول 6 دقائق حتى يبدي يصعد براسك ، هذولة العلماء الي سوو هذا البحث ميعرفون عندي اصدقاء يسكرون بالمزّة

15- العلم يرصد فيتامين B12 بالمطر ، عزة بعينكم

16- ببعض الظروف ، المي الحار يتجمد اسرع من المي البارد

17- اثناء عملية التمثيل الضوئي بالنباتات ، النباتات تبعث ضوء خافت جداً ، متكدر العين المجردة تشوفه ، الّا عن طريق الآلآت

18- يستغرق الضوء 100 الف سنة حتى يسافر من نهاية مجرة درب التبانة للمجرة الي بصفنه

19- تحشيشة علمية
جيب ورقة ، ورقة عادية ، سُمكها فرضاً 1 ملم ، اطويها مرة ، رح يصير سمكها 2 ملم ، اطويها مرتين رح يصير سمكها 4 ملم ، اطويها ثلاث مرات رح يصير سمكها 8 ملم بعدين 16 الخ
اذا كدرت تطويها 42 مرة ، فسمكها رح يكون كافي لملئ الحيز بين الارض والقمر
واذا كدرت تطويها 50 مرة ، فسمكها رح يكون كافي لملئ الحيز بين الارض والشمس
واذا طويتها 96 مرة ، فسمكها رح يكون كافي لملئ حيز الكون المرئي بالكامل

20- العلم يكول : تكدر تشعل النار بوجود الجليد ، هو يكول مو اني

 1- http://bit.ly/1cWs7L7
2- http://bit.ly/1dt99MV
3- http://on.today.com/1F6mMax
4- http://bit.ly/1ApBjmb
5- http://bit.ly/1itIAI3
6- http://bit.ly/1ceFpBW
7- http://bbc.in/1lOariZ
8- http://bbc.in/Jgpwgl
9- http://bit.ly/1PHVmmG
10- http://bit.ly/Zzj5gA
11- http://bit.ly/1dtaAen
12- http://bit.ly/1GyvtQc
13- http://bit.ly/1JBPl3H
14- http://bit.ly/1IVCInb
15- http://bit.ly/1FQwYui
16- http://bit.ly/1cXqfhD
17- http://1.usa.gov/1LC7Zd7
18- http://bit.ly/1HGCiOz
19- http://bit.ly/1JR3Rag
20- http://bit.ly/1EtdZyO

نظرية التطور- ظهور الانسان / درنفيسيات

هاي شوية معلومات عن ظهور الانسان وانتشاره جغرافياً ، وتنوعه الجيني وبابا غنوج والتبولة الخاصة بي

1- الانسان الحديث (هيئتنه الي احنه عليها هسه) ظهر قبل 200 - 150 الف سنة
ظهر بافريقيا ، والي اطلق العلم عليه تسمية (الانسان العاقل)
قبل 80 الف سنة ، طلع هذا الانسان من افريقيا وانتشر بالقارات ، اسيا وافريقيا واوربا
بس ذولة من انتشروا ، لگوا مجاميع بشرية حيييل تشبههم ، هاي المجاميع البشرية اطلق عليهم العلم (الانسان المنتصب) ، الانسان المنتصب ، طلع تارك افريقيا ومهاجر منها قبل مليون سنة ، وعايش لمئات الآلآف من السنين بأوراسيا (اوربا واسيا)

2- الانسان ، هو الكائن الي يحمل صفة (اقل كائن متنوع جينياً)
اقل كائن متنوع جينياً لأن هو متطور عن طريق مجموعة قليلة من الاسلاف المشتركة الي عاشت بشرق افريقيا ، بس شلون الواحد يحسبها ورقة وقلم؟؟
يكلّك بالحسابات السكانية اكو شي اسمه "حجم المجتمع او العيّنة الفعّال"
هذا شنو سالفته ؟ هذا سالفته تكول انك تحتاج لـ 15 الف انسان حتى تكدر تنتج جميع انواع الجينات البشرية المختلفة ، اوكي؟
وتحتاج لـ 733 الف فارة حتى تنتج كل الجينات المختلفة عند الفيران
بقسمة عدد الفيران على عدد البشر الناتج يطلع : كل 1 جين عند الانسان يقابله 48 جين عند الفارة ، وكذلك من يتكابل الانسان وية بقية الكائنات ، يبقى اقل كائن متنوع جينياً

3- انت او اني وانتِ وهي ، قد نكون جزء من انسان النايدرتال
يكشف التحليل الجيني لعظام النايدرتال وجود جينات للأنسان الي طفر من افريقيا وكعد بأسيا وبالشرق الاوسط واوربا
وأكو أحتمالية جبيرة ان انسان النايدرتال تزوج من هذا الانسان الي طفر من افريقيا وعاش ويا بتبات ونبات وخلف صبيان وبنات
لمعلومات اكثر حول هذي الجزئية العظيمة ، اتمنى تشوفون وثائقي اسمه رحلة البشر المذهلة ، بي هواية تفاصيل مهمة عن هذا الموضوع
http://bit.ly/1Q8epBB

4- بالنقطة الثانية گلنه انه الانسان يملك اقل تنوع جيني بين الكائنات
وكلت السبب يعزى الى حجم المجتمع الفعال الانساني من يتقارن وية غير مجتمع فعّال
بس!! هو المجتمع الفعّال نفس المجتمع الحقيقي الفعلي ؟ لا طبعاً ، فنجي عن طريق المجتمع الفعلي نعرف ليش انكمش التنوع الجيني للبشر
اكو هواية نظريات تحاول تفسر ليش الجنس البشري
اول هاي النظريات الي تفسّر ليش الجنس البشري فقير جينياً هي حادثة صارت قبل 80 الف سنة ، وراح ضحيتها هواية بشر ، وهي حادثة بركان توبا الي چان كفيل ان يغرگ قارة بكاملها
بالاضافة الى حدث البركان ، عامل التهجين بين المجاميع البشرية هم اله دور بتقليص التنوع الجيني البشري

5- قبل 50 الف سنة ، احنه البشر عبرنه المحيط الهندي ووصلنه لاستراليا وسكن البشر بيها ، بأستخدام زوارق من القصب
ويقال ، بأنها نفس الزوارق الي سافرنه بيها للأمريكيتين (الشمالية والجنوبية) قبل 17 الف
هذا الشي بذاك الوقت بالضبط يساوي رحلة الانسان للقمر ، فد شي مذهل

6- ثقافة الانسان العاقل (احنه) ، عمرها اقل من 50 الف سنة
الثقافة بدت عن طريق الرموز كأداة تواصل ، الحلي والمجوهرات ، الرقصات الجماعية
النار ايضاً نكدر نعتبرها نوع من انواع الثقافة الي ظهرت قبل اقل من 50 الف سنة

7- الانسان الحديث چان دائم الاستخدام للنار
الانسان العاقل اكتشف النار وكام يستخدمها بصناعة كل ادواته
احنه هسه ب2015 ننظر للنار على انه شي تافه وما اله قيمة مقارنة بالتكنلوجية الي غزت الكوكب
بس لو نرجع ونحط نفسنه بمكانهم .... جان لكينا انه لولا النار جان ما انبنت هاي الحضارات ولا وصل الانسان لهاي المواصيل

8- الجنس البشري بعد يتطور، وبشكل سريع وملفت للنظر
هلووو ، كيف الحال
علماء البايلوجيا التطورية عزلوا مناطق قليلة من الجينوم البشري وخلوها قيد اختبار الطفرات
وبدوا يلاحظون سلوكها ويقارنوا وية سلوكيات بشر موجودين بنفس الرقعة الي اخذوا منها العينات مال الجينوم
كدروا يلاحظون ان هاي الجينات المعزولة قد تكون ذات صلة بحجم الدماغ وتنميته وذكائه
وقد تكون مستقبلاً عن مقاومتنه للامراض او تحمل اكل انواع جديدة من الاطعمة
وهذا الوثائقي حلو شوفوا بدربكم عن هاي المسألة
اسمه : هل ما زلنا نتطور ؟؟
http://bit.ly/Lg9HHY
.................................
حبشكلات

1- http://bit.ly/1PKb68J
2- http://1.usa.gov/1FTM95Y
3- http://bit.ly/1GApRFa
4- http://bit.ly/1FB3BJs
5- http://bit.ly/1FB3BJs
6- http://bit.ly/1ee1uyQ
7- http://bit.ly/1RkbMPx
8- http://bit.ly/1FTNJFb

حقائق عن الرياضيات / درنفيسيات

سوالف عالرياضيات حيل تونّس
يمه الرياضيات يمّه ، اذوب واشرب حبوب

1- فيكة بعملية الضرب
111,111,111 
x
111,111,111
=
12,345,678,987,654,321

2- اذا چان عندك بيتزا ، نصف قطرها = z ، والسُمُك مالتها = a
فحجمها شلون يطلع ؟؟ يطلع عن طريق هذا القانون : Pi*Z*Z*A
يعني تضرب النسبة الثابتة الي هي 3.14 x نصف القطر تربيع x السُمُك

3- خوالنا وعمامنا وتاج راسنا البابليين همّ الي اخترعوا النظام الستيني بدال ما يصير النظام عشري ، ولهذا السبب عدنه 60 ثانية بالدقيقة و60 دقيقة بالساعة
وكذلك عدنا 360 درجة بدورة الدائرة الوحدة

4- الطلاب الي يعلچون العلچ ، مستواهم بالرياضيات اعلى من الطلاب الي ميعلچون
(يلّه ركض نروح نشتري عليچ بوبي ، اي الّا بوبي)

5- الرقم 2520 هو اصغر رقم بسلسلة الاعداد الي يقبل القسمة على الاعداد من 1 الى 10 بدون باقي

6- علماء الرياضيات يكولون ، انه اكو 177,147 طريقة لربط ربطة العنق

7- يگلك بسنة 1900 ، عدد كتب الرياضيات چان تقريباً 80 كتاب
امّا هسه ، بـ 2015 ، فكتب الرياضيات تجاوز عددهن الـ 100 الف كتاب
(سرعة العلم فضييييييييييييييعة)

8- بعلم الاحتمالية ، يگلك اذا اجتمعوا 23 شخص فما فوق بمكان واحد ، فأكو احتمالية = 50% ان يطلع 2 من عدهم متشابهين بالمواليد

9- نيوتن ، اخترع التفاضل والتكامل بنفس المدة الي يستغرقها واحدنا بدراسة التفاضل والتكامل
(ابن الطحال)

الجزر يقوي النظر!!! لايابوي / درنفيسيات

$#@- ماماتي ، اكل جزر حتى تتقوى عينك

#- وبعد؟ آكل سبيناخ حتى اصير قوي مثل پاپاي

$#@- اي ماماتي حتى يتقوى نظرك ويتقوى جسمك

#- شوفي يمّه ، اني ما اريد افوت وياچ بجدل واغير عندچ قناعات عمرها عشرات السنين ، بس احب اگلچ ان هاي خرافة ، الجزر ميقوي النظر

$#@- لا ابني شلون ؟ الجزر والسبيناخ كلش مفيدات ، الجزر مليان فيتامين A وهذا الفيتامين كلش مفيد للنظر ، والسبيناخ كله حديد وينطيك طاقة وحيوية

#- ملاحظتي شي يمّه؟

$#@- شألاحظ يعني ؟

#- ملاحظتي انه انتو ، واقصد هذا الجيل (خمسيني ستيني سبعيني) يتداولون هاي المعلومتين وية ذريتهم؟؟ معلومة (الجزر يقوي النظر)
و
( السبيناخ ينطي طاقة)

$#@- اي غير صحيحات ومجرّبات

#- يمّه ، السالفة مو سالفة صحيحة ومجرّبة ، القضية تخص : شنو الي يخليكم تركزون على هالنباتات بس ؟ مع العلم هواية نباتات بيهن حديد وفيتامين A ؟؟
اني وياج بالكامل ان نقص فيتامين A بالجسم من الممكن ان يؤدي الى ضعف البصر ، وتليّف بالقرنية ، بس هل الجزر وحده يمنع هاي الامراض؟

$#@- اي عيني ، هواية من الاطباء يطلعون يحجون بفوايد الجزر بس للعين

#- شوفي حجّية ، اكو مادة اسمها [بيتا كاروتين] هاي المادة موجودة بهواية نباتات الي بيها صبغات طبيعية ، مثل {البتيته ، العنجاص الاحمر ، الجزر ، السبيناخ}
هاي المادة من تطب للمعدة ، جدار المعدة رأساً يمتصها
ويحولها لفيتامين A ويستفاد منها كل الجسم

$#@- شوف ، يعني النقص بالفيتامين يسبب العمى ، فالواحد يحرّص حتى لا يوكع بالعمى

#- عيناي ، هاي السالفة للي عدهم نقص ، بس الي ماعنده نقص وياكل جزر شيصيرله؟ مايصيرله شي كفيلچ ام سعدون ، لو هسه تجيبيله سايلو مال سمنت وتترسيلهيا جزر
لان بأختصار ، هاي سالفة الجزر يقوي النظر ، والسبيناخ ينطي طاقة
ماهي الّا اشاعات تم تداولها بالحرب العالمية الثانية من قِبل بيريطانيا

$#@- لا عليك العباس

#- اي مثل ما اگلچ ، بالحرب العالمية الثانية المانيا حاصرت بيريطانيا ، ومنعت عليها استيراد السكّر ، فشسوت بيريطانيا؟؟
اطلقت حملة دعاية چبيرة ، بدوها من جنود مقاومة الطائرات مال السلاح الملكي وگعوا اكثر من طيارة بالليل
الحكومة بدت تستغل هاي السوالف ، وتحشد الناس اعلامياً حتى تستهلك الجزر ، لان بي نسبه عالية من السكر ، وكذلك السبيناخ نفس الحالة ، بسبب الحصار الصار على بيريطانيا ، وشحّة دخول السلع
أستغلت بيريطانيا وفرة الجزر والسبيناخ باراضيها ، حتى تخلي الشعب يعتمد عليها وهو مرتاح
هذا كل ما بالموضوع

$#@- عساك ما اكلت

#- ضاجت الحجّية
http://bit.ly/WBcrVY
http://1.usa.gov/1FeZDD0
http://bit.ly/1hWEDom
http://bit.ly/1HSPfru

حقائق علمية عن القمر / درنفيسيات

‫#‏غَزل_كالبتوزي‬

-=تعالي تعالي ، اليوم عاجبني اتغزل بيچ شوية

*/ اي بشرفك ، ترة طكت روحي صارلك هواية مامسمعني حچي حلو

-= اكو بيتين حلوات احسهن ينطبقن عليج ، الاول
هي البدرُ حسناً، والنساءُ كواكبٌ..... وشتّانَ ما بين الكواكب والبدرِ
وهذا اللاخ هم يرهم عليچ مال الخال ابو الطيب الموته نه بي يكول :
فلم أرى بدرآ ضاحكآ قبل وجهها ....... ولم ترى قبلي ميتآ يتكلمُ

*/ ياي ياي يجنن ، هاي سنو ، (بدراً ضاحكاً) يخبؤؤؤؤش ، حبيييت

-= اشتغلت ، يعني هذا الطلع منچ؟؟ ما يستوقفچ مثلاً شكل القمر، دورانه ، بُعده عن الارض ، انعكاس الضوء .... هاهية ، راساً تخيلتي "امّوشن" وديضحك؟

*/ اي لتصير مكروه ، شتريد اشوفه لعد ، هو هيج ، فد شي كيوت

-= كيوت ، ام عطوب ، الگمر كيوت؟ دباعي المصايب البي :
1- كل سنة ، القمر يبوك من طاقة الارض ، ويستخدم هاي الطاقة حتى يرفع نفسه من المدار مالته بمسافة 3.8 سينتيمتر
يكول الباحثين ، ان اول ما تشكّل القمر كان يبعد عن الارض مسافة (14 الف ميل) وهسه يبّعد عن الارض (280 الف ميل)

2- المد والجزر الي يصير بسبب سرقة القمر لطاقة دوران الارض ، رح يسبب ابطاء كوكبنا 1.5 ملي ثانية كل قرن

3- القمر مالتنا اكبر من كوكب بلوتو ، وتقريباً مساحته ربع قُطر الارض ، واكو علماء فضاء يكولون ان القمر هو كوكب صغير ، ويكولون ان نظام (الارض والقمر) هو نظام الكوكب المزدوج ، مثل نظام بلوتو والقمر مالته الي اسمه "شارون"

4- رواد فضاء رحلة ابولو من نزلوا للقمر ، نزلوا وياهم معدات قياس النشاط الزلزالي ، لأن لكوا شقوق صغيرة كلش على سطح القمر ... تبين ان هاي الشقوق صارت بفعل جاذبية الارض بالوقت الي جان القمر قريب من الارض
ومن خلال التحليلات الجويلوجية ، عرفوا ان نواة القمر تشكل 2-4% من كتلة القمر ، مقارنة وية نواة الارض هاي النسبة قليلة ، لأن نواة الارض المليئة بالحديد المنصهر تشكل تقريباً 30% من كتلة الارض

5- شايفة من اتغزل بيچ واگلچ وجهچ يخبل ، گمر مدوّر چنّه چركاية؟؟
بعد لتصدكيني ، واعتبري هذا الغزل غير مدعوم بأدلّة ، لأن بالحقيقة
القمر شكله بيضوي مو دائري sunglasses emoticon

6- القمر تكوّن اثر تصادمات صخرة عملاقة انصدمت بالارض حجمها بكد كوكب المريخ قبل تقريباً 4.1 مليار سنة ، واثار التصادمات موجودة لحد الان على سطح القمر بشكل {ندوب}
هاي الندوب ليش متروح ؟؟ ومن ذاك الوقت باقية وتتمدد؟؟
لان الطابع الجويلوجي للقمر مو نشط ، يعني مابي لا رياح لا امطار لا عواصف
ماكو ذني السوالف حتى ينعاد تسطيح السطح مرة ثانية

7- برحلة ابولو 14 سنة 1971 ، رائد الفضاء ستيوارت روسا اخذ ويا بذور من الارض ، وزرعهن ، وسكاهن مي وسماد وسوة كل الحبشكلات الزراعية الواجبة لتوفر نمو البذور
بالرحلة الي تلت رحلة ابولو 14 ، روّاد الفضاء شافوا ان البذور خضّرت ، شلعوهن من مكانهن ، ورجعوا زرعوهن بالارض ، وسموهن (الاشجار التي جائت من القمر) وعددهن 400 شجرة ، وبعدهن لحد الان بصحة وعافية

*/ هاي المحاضرة كلها لان كتلك الگمر كيوت ، شكد مكروه ، ما احبك

-= لا حياتي غير احبچ واتشاقه وياچ ، شعندي غيرچ اني احبل اجيب

*/ ديلّه صالحني لان زعلتني من كتلي ام عطوب

-= امشي عازمچ على سوشي

*/ هذا شنو النوب

-= متعرفي؟ هاي اكله بيها بروتينات وتركيبها الكيميا......

*/ بــــــــــــــــــــــــــــــــــــــــــــــــــــــس ، ويگلك ليش تتفرج مسلسلات تركية
http://bit.ly/1ipaRva

الكآبة وماهيتها علمياً

+*- ها حياتي شبيك ؟ صارلك كم يوم مو على بعضك؟

-+= ما اعرف شأگلك ؟؟ بس احس معركة جرف الصخر وحديثة صايرة براسي ، دايخ ومالي خلگ حتى اتنفس ، ناهيك عن فقدان اي هدف ، ما اعرف شنو الوجبة ، اشو اقره واطلع واكتب واسولف واضحك وافتح فيس واحجي وية العالم ، بس محتصر كلش ، الضغط الي بداخلي احس بي رح يسببلي سوبر نوڤا ، او انضغط واتحول ثقب اسود

+*- اوووو ، كآبة حادة ، وواصلة بيك لقلعة سكّر

-+= اني هم كلت هيچ ، وحاولت شوية استمع شغلات روحانية مثل الدعاء والقران لأن يكولون شوية تخفف ، بس ما رهمت ، نفس الطاس ونفس الحمام

+*- اي طبعاً ميتغير شي ، لأن الكآبة مو فد شي نفسي ابداً ، الكآبة مرض عضوي بايلوجي بعيد كل البعد عن السايكولوجي ، والي بيك هو نقص واضح بهرمون السيروتونين ، وهذا النقص يجي بالبداية عن طريق التوتر المستمر ، والي بالنتيجة يسببلك تقلص بمنطقة بالدماغ اسمها (الحُصين) هاي المنطقة هي ام المشاعر والذكريات ، وكل ما تبقى حالتك ، رح يزداد التقلص مال هاي المنطقة ، وتزداد كآبتك ، بالاضافة لهذا السرد ، الكآبة تنتقل عن طريق مورثات من الاب ومن الام ، تدري لو ما تدري بعد خالك؟
المورثة المسؤولة عن نقل هرمون السيروتونين ، تخلي الفرد اكثر عرضة للاصابة بالكتئاب ، شوف .. حبسطهالك
كل فرد من عدنه يملك نسختين من هاي المورثة موجودة بالحمض النووي مالته ، نسخة من الاب ونسخة من الام ، وشكلها يكون يأما قصير يأما طويل ، العلماء سوو بحث على 800 شخص مصابين بالاكتئاب ، وبعد تحليل حمضهم النووي ، تبين ان الي شكل مورثتهم الخاصة بنقل الهرمون قصيرة، فذولة رح يكونون معرضين للأكتئاب باي وقت وبأي مكان ، وعلاجهم ياخذ وقت
والي شكل مورثتهم طويلة ، ذولة اقل عرضة للأكتئاب ، وعلاجهم سهل نوعاً ما
واعتقد انت المورثة مالتك طويلة

-+= خوية والحل؟ اذا على حچيك، اني بعدلي اسبوعين ودماغي كلّه يتقلص ويصير طوبة مال منضدة ، وين انطي وجهي ؟

+*- هواية دراسات طلعت على عقاقير تفك التقلص الي يصير بمنطقة (الحُصين) ، تكدر تسأل اي طبيب نفسية ويوجهك على عقار معين ، لأن تراكم الاكتئاب يوصلك لمراحل ماتتخيلها ، اول مرحلة هي انك تكون كائن فاقد الانتجية بكل شي بالحياة

-+= هي مال طبيب؟؟ اگله مابيه حيل اتنفس ، النوب اروح لطبيب!

+*- ماشي ، مو مشكلة ، انت تحب الاكل، ليش متستغل حبك للأكل بعلاج نفسك ؟

-+= شلون يعني ، ما افتهمت؟

+*- سهلة ، اكو هواية اطعمة موجودة بحياتنا تأثيرها يكون مباشر نوعاً على هرمون السيروتونين ، استغل وجودها بحياتنا وأكعد اضرب وارجع ليورة
بس العامل الاول الي لازم تفقده حتى تتخلص من الكآبة هو التوتر

-+= اي هاي خوش ، شني هاي الاكلات بالضبط؟

+*- الدراسات هواية الي تخص الاطعمة المتفاعلة مع الهرمونات ، بس اقواهن ، والي يحث عليها اي مركز بحثي غذائي هي الاطعمة الي بيها هاي العناصر : الكالسيوم ، الكروم ، حمض الفوليك ، الحديد ، المغنيسيوم ، اوميكا 3 ، فيتامين B6 ، فيتامين B12 ، فيتامين D ، وعنصر الزنك

-+= هاي العناصر موجودة بالعراق ؟؟ اعتقد اذا ادور عليهن رح يطلعلي هذا العنصر غير موجود في بلدك

+*- هههههههه لاعمي كلهن موجودات بأطعمة تنباع يم اي ابو مخضّر او سوبر ماركت ، وهسه رح ادزلك قائمة بالعناصر والاطعمة الخاصة بيهن ، بالاضافة الى شوية شروحات للتخلص من الكآبة

هذا مقال معدّل من هارفرد يسولفلك عن الكآبة بصورة اكثر عمقاً
http://bit.ly/1F48mxV

وهذني ملحقات حبشكلاتية
http://bit.ly/1iRLTpB
http://bit.ly/1mfyibg
http://bit.ly/1kxsJcJ

وهذا مال الاطعمة
http://bit.ly/1k5QA2v

مجلس عزاء فيسبوكي !!!!!!

--آآآآآآخ لو بس يصير الي براسي

-اي ؟ وشنو براسك ياعيطَبول ؟

--ولك هيج كون يصير واجب الفاتحة عن طريق الفيس البوك

-ما استحيت على نفسك بالله من هالسالفة الغمّة؟ ولك شيكولون علينا العالم؟
وعاداتنا وتقاليدنا شلون بلّه ؟ نسويلها بلوك ؟

--اي نسويلها بلوك , لان عاداتنا وتقاليدنا تطحن بچبد عائلة الفقيد
يعني بس تخيل وياية , هو ابو لو اخو لو امه لو واحد من اقاربه ميتين , وحزين , وروحه مكزبرة , وبعدين يجي يرضّي فلان ويرضّي علّان والله شنو عاداتنا وتقاليدنا
واليكتلك ان عاداتنا وتقاليدنا تبرر "للمواسي" السوالف والضحك داخل مجلس العزاء
بشرفي واكفة

-اي , وحضرة جناب الارشدوق المتمثل بشخصك شيقترح ؟

--والله اني اقترح اي واحد يصير عنده عزاء "بعيد الشر عنّك وعن الخلفوك"
يفتح حساب الفيس مالته , ويكتب نفس الكليشة الي رح يكتبها يم الخطاط , بس هالمرة مايكتب ((تقام في الحسينية الفلانية او الجامع الفلاني )) , وانما يكتب
"تُستقبل التعازي داخل هذا المنشور"

-والكهوة شلون ؟ والجاي والمي ؟

--ماكو داعي , هو المُعلّق يفوت ويكتب "السلام عليكم , رحم الله من قرأ الفاتحة , او بسم الاب والابن والروح القدس , او اي سُنينة تعود لمذهب او دين"
ويجي صاحب العزاء [الي هو نفسه صاحب المنشور] ويلصقلهم هذا السمايل cry emoticon
تعبيراً عن مشاركته مراسيم العزاء الالكتروني , ويتم لصق الايات والمزامير داخل المنشور تعبيراً عن الاحزان

-بشرفي مسودن ومخبل ومجنون , تلاثتهن

--اي صحيح مسودن , اصلاً العاقل هو الي يصرف اكثر من عشر ملايين على ذبايح واكل , نصه ينذب بالزبل , والنص اللاخ يروح ببطون تجي حتى تسولف وتضحك وتنكت وتشرب جاي

-ليش والواجب ؟ شنو نسيته؟

--شبي الــ Like ؟؟؟

هرمون الاوكسيتوسين بين الحب ونسيان الحب

 وين الحبچية؟؟
وين الجماعة الي يتألمون ورة ساعة 12 عالكورك والاسيا؟؟
للذكور المضروبين بواري فقط

تعال جاي مولاي ، اجيت ؟ هلا بيك
استريح
الله ابو الخير ، صب چاي لعمك

--شوكت تعاوفتو؟

-والله صار اكثر من سنة ، واني شفت حياتي وشبابي بعيد عنها ، اني ناسيها
واصلاً ولا تجي على بالي

--اممممم متأكد من تجي على بالك ما يصيبك نوع من الهياج المشاعيري والاحاسيسي والمعاميقي؟؟

-اي يجي ، ودا ادرب نفسي على تجاهل هذا الاحساس

-- انسى ، لو هسه يجي الاسقربوط اللولبي متكدر تتجاهله

-ما اكدر انسى الاسقربوط اللولبي لو الاحساس ؟؟

--ههههه لا ، الاحساس

-ليش ما اكدر ؟؟

--خل اسولفلك مولاي ، بادئ ذي بدئ "شلوني بهاي الجملة" ؟
شنو هو الحب ؟ الحب يا عم بخ هو عبارة عن تفاعلات كيميائية ناتجة عن افرازات يدعبلها الدماغ على النظام مالته ، هاي التفاعلات عبارة عن هرمونات وانزيمات
تشترك بصنع معجون المحبة "الجعفري ستايل"؟
وتبدي الحميمية بين الرجل والانثى
بس ، شنو اكثر هرمون يشارك بصنع هاي الخلطة ؟
اكثر هرمون هو : ألأوكسيتوسين والمسمى بهرمون الحب

-عمي شدتحجي ، يا اكسيتوسين يامحمود ياسين

--زمبؤلك كده يعم الحج ، هذا الهرمون موجود بالنسوان وبالزلم بس عمله بالنسوان يختلف عن عمله عند الزلم
بالنسوان هذا الهرمون يفرزة الفص الخلفي للغدة النخامية حتى يساهم بصنع تقلصات للرحم اثناء الانجاب ، ويسهل عملية الانجاب ، بالاضافة الى انه يحفز ضخ الحليب بصدر الانثى اثناء الملامسة الي تتم بين فم الطفل وحلمة الانثى
فتشوف الوعي الغرائزي مال الانثى على طفلها عالي جداً ، وتكوم تحب طفلها بفترة الامومة بصورة مو تبيعية ، وروح ابوي مو تبيعية ، تحبه اكثر من الزلمة ام السحورة

بالزلم ، هذا الهرمون هم يفرزه الفص الخلفي ، بس شوكت يتفعّل هذا الهرمون بصورة تامّة ؟؟ يتفعّل بالحالة الي يتعرف بيها واحدنا على نثية ، ويحبها
يحبها حب حقيقي ها ، مو حب قناة المشرق (هلو كونت ممكن اعرف نسبة الحب بيني وبين "حافّة حاجبها والكل عاجبها")

الهرمون عند الزلم بي مستوى ، اعلى مستوى يوصل بي الزلمة بضخ هذا الهرمون هو 90% ، يعني يتخبل الزلمة من ورة الحب ، طبعاً احنه بالعراق يكولون [هاي ساحرتله] بس بالحقيقة هاي نسبة ألأوكسيتوسين عنده صاعد للبنكة

بمرور الزمن ، يهبط المستوى لل70% ويستقر .... والحياة تمشي

-لحد هنا الحجي حلو ، بس وين الربط وية حالتي ؟؟

--كل الربط موجود مولاي ، لاتستعجل على رزقك
هذا الهرمون هو المسبب لهاي الاحاسيس المعاميقية الي تجيك من تتذكر حبيبتك
لأنه هو صاحب الفضل الاول بأرتباطك بيها عاطفياً او (كيميائياً) حسب لغة العلم
من تستجلب الذكرى الي تخص حبيبتك ، هرمون ألأكسيتوسين رح يتعامل مع هذي الذكرى على انه هي واقع ديصير هسه ، ما يتعامل وياها كذكرى ، ولذلك ينفرز الهرمون ، وانت تبقى تتگلّه

-زين والحل ؟ اريد انساها نهائياً ، وما اريد تجيني هاي الاحاسيس الي تذكرني بيها واظل ضايج بسببها

--تريد نصيحتي ؟ حاول تدخل صيدلة وطور فد عقار مثبط لهذا الهرمون
واشربه ، بس وراها تدري شرح يصير عندك ؟؟ رح يصير عندك تبوّل لا ارادي
بسبب النقص الحاصل بهرمون ألأوكسيتوسين

-يعني لو رب ميبقى براسي من ورة الذكريات ، لو ابول على نفسي؟؟
انعل ابو الحب لابو التيتانيك

--شايل وياك علّاگة؟

-اي ، شتسوي بيها ؟

--اخذ وياك هاي المصادر ، واشربهن وية جاي العصر بلكت تنسى

http://www.livescience.com/35219-11-effects-of-oxytocin.html
http://www.livescience.com/18644-long-relationship-oxytocin…
http://healthland.time.com/…/how-oxytocin-makes-men-almost…/
https://markturrell.wordpress.com/…/sex-and-the-brain-how-…/