الجمعة، 3 يوليو 2015

ممارسة الجنس قبل المباريات / درنفيسيات

منشور خاص بالرياضيين والرياضيات (ان وجدنْ)
€/ اي عمي ، كله تراكسودات اصلية وترانشوزات وتدريب ، الي يشوفك يكول باچر يتعاقدون وياك المان ستي
$/ ههههههه هاي شبيك بعد كم يوم حتى كارتون رح يسوون عليه ، يسموه كابتن "مصيوَل" ، مالك علاقة هالسنة احنه ناخذ الدوري
€/ الموفقية حب ، تمريناتكم شلونها؟
$/ والله زينة ، بس اكو شغلة مأذيتني حيل ، ومسوية عندي رگله بالدرايڤ شيفت ، ومخربطة عندي البساتم شوية
€/ شنيّة ولك ؟
$/ صارلي 3 اسابيع ماطاخ مرتي ، السم صاعد لراسي صعدة بت كلب ، بحيث اذا اشم عطر مال بنية تصير عندي حبشكلات اسفنيكية
€/ وهذا يا ارعن گلّك لتنام وية مرتك ؟؟
$/ المدرب غير ، المدرب مانعنه من الممارسة ، يگول تهبط من اللياقة مالتكم ، واني بصراحة ملتزم بالتعليمات ،، بس بنفس الوقت گاب للستار ، ما اعرف وين انطي وجهي بالليل
€/ اسمحلي اگلك ان المدرب مالتك عبارة عن مصران ماله داعي موجود بجوف كنغر استرالي عقيم
$/ بالعكس ولك اشوفه مرتب وذكي ، ومعظم انجازات الفريق بسببه ، بس هاي السالفة منين طلعها ! من يا بنكرياس ، ما اعرف!!
€/ شوف حبي ، هاي سالفة منع ممارسة الجنس للرياضيين والرياضيات عبارة عن اسطورة اغريقية قديمة ، مفادها : ان اليونانيين جانوا يعتقدون ان "ماء الجنس" [للذكر والانثى] هو هِبة من هبات الالهة ، والقوة جاية من عنده ، فجانوا حريصين كلش على عدم فقدانه ، ومشت هاي الاسطورة بغير طريقة ، بعصرنه الحديث على اساس الممارسة الجنسية قبل التمارين والمباريات (لأي رياضة) تسبب هبوط باللياقة البدنية
$/ اي وهذا الكلام صحيح ، تهبط من اللياقة
€/ شتهبط اللياقة رحمة الوالديك ، كل مقاييس السعرات الحرارية تكول ان العملية الجنسية تحرگ 50 سعرة حرارية بس ، وما يعادل صعود ونزول الدرج مرتين ، بالاضافة الى مسألة كلش مهمة ، بقاء هرمون التوستستيرون بجسمك يخليك تكون عدائي وشرس ، لابد من ان تفقده بفترات متقاربة ، وآخر الدراسات اثبتت ان ممارسة الجنس قبل المباراة ترفع من الاداء ، وتقلل الهجومية ، وتخليك تنطي باص بصورة صحيحة ، مو تصير مضحكة مثل خلدون ابراهيم
$/ صدك تحجي ؟ لعد ليش يكولولنه لتمارسون ، اما صدك ذولة طحالات
اوكف لعد اوكف ........... الو / حياتي شلونچ ، تحضري اليوم نلعب مگالب ، البسي السيت البابونگي الجبتلچيا ذاك اليوم
€/ هههههههههههههههه بابونگي يا ظالم النفس
مرسلة بواسطة في ليست هناك تعليقات:

الكوكا كولا / درنفيسيات


الكوكا كولا وما ادراك ما الكوكا كولا
1- الكوكا كولا اول ما ظهر ، ظهر على انه منتوج محفز للأعصاب الخاملة ويستخدموه ايضاً بتحلية النبيذ
2- شكل البُطل مستوحى من الازياء النسائية الي جانت موجودة بالعصر الفكتوري (الفستان يكون محصور من تحت الركبة وعريض من الخصر)
3- الكوكا تعتبر عنصر فعّال كمانع حمل ، بسبب وجود حامض الكاربونيك بالكوكا الي يضعف عمل النطف وفعاليتها
4- مشروب الكوكا يعتبر مشروب عتصري اول ما ظهر ، چانو بس البيض يشربوا ، والشركة الام نادراً ما جانت تزود المناطقة الي بيها "سود" بهذا المشروب ، من الـ 1920 وحتى العمال السود الي بالشركة جان يحسبولهم اجور بخسة حيل ، وبسنة 2000 السود رفعوا دعوة على الشركة ، وفازوا بيها ، الدعوى بيها هواية جوانب
5- بعد الحرب العالمية الثانية ، وبسبب الاحباط الاممي الي جان راكب الشعوب ، وبسبب ازمة الهوية الي جانوا يمرون بيها الشباب ، شركة كوكا كولا كتبت على القوطية مالتها جملة اثرت نوعاً ما بالشباب
وهي : Things are going to be OK ، ومعناها : الامور تسير على ما يرام
6- شركة كوكا سوت ملصقات اعلانية ، هاي الملصقات بيهن صور اباحية مو اي واحد يكدر ينتبه عليها الّا عن قرب (يا واطي)
7- كوكا كولا مرة طبعت عبارة "انت متخلف" على قبغات بطالة مشروبات الفيتامين مالتهم : هذا المشروب كون يتوزع لبعض شيوخ العشائر العراقية
8- نكهة الكوكا كولا تجي من نفس النبات الي ينصنع منه (مخدر الكوكايين)
9- الفرد الواحد ، يحتاج 9 سنوات حتى يجرب كل منتجات كوكا كولا ، بشرط يشربله كل يوم منتج شكل
معلومة جانبية : لو كانت كوكا كولا دولة ، لكان اقتصادها رقمه 84 عالعالم
اني اشتهيت كوكا ، منو يريد
مرسلة بواسطة في ليست هناك تعليقات:

هل لأسمائنا قوة معينة؟ / درنفيسيات


Name 1 : الف مبروووووووووك ، حبيبي شايف كل الخير ، ويتربى بعزك وتشوف احفاد احفاده ، يمّه فدوة باع حلگه شلون يخبل ، شنو شرح تسميه ؟
Name 2 : والله ناوي اسمي ديڤيد ، اسم احبه كلش
Name 1 : اعوذ بالله ، شنو هالاسم يمعوّد ، رح تعقده للولد
Name 2 : ترة مرح اسمي جريو ، ولا چليب ، ولا نجانة .... ديڤيد اسم حلو واني متأكد رح يعجبه من يكبر
Name 1 : اولاً اسم يهودي ، وهذا منافي لتعاليمنا ، ثانياً : منو كال رح يصير توافق بين اسمك واسمه واسم امّه ؟؟ انت اسمك ماهر وامّه آمنه وهذا حرف الـ "ڤـ" يعتبر دخيل على اللغة العربية ، والمصيبة انتو ثنيناتكم ما عدكم هذا الحرف بأسمكم ، رح تديحوه للولد
Name 2 : ممكن شوية تبردلي ؟ لأن مستوى الحماوة صعد حيل ، واحنه طبينه بالصيف ، بس على كيفك وية الوادم ، يرنگو
Name 1 : لاحماوة ولا حرارة ، بالعكس يومية امزمز مع ميرندا ، بس انت ما اعرف شلونك ، ولا چنّك تدري ان أي اسم بي طاقة تاثر على سلوكيات وتحركات ومستقبل حامل الاسم ، وان حروف اي اسم بيها اهتزازات محد يكدر يشوفها غير بس العرفانيين او الروحانيين ، وهاي الاهتزازات تاثر وتتأثر بالمحيط
غلّس ، ولا چنّك تدري
Name 2 : دكلي هيج من الاول وفضها ، گلي انه انت مولع بمشاهدة ابو علي الشيباني ومضروب عندك الفيوز مال الاويل پم
انت تكول انه الاسم يأثر على السلوكيات ، وهواية من طبائع حامل الاسم مأخوذه من الاسم ، لوز
هسه اني اسمي ماهر ، وما املك اي مهارة ، هاي شلون؟
Name 1 : هااااااا ، هنا السالفة تختلف ، معناه انه انت تملك اسم خفي ميعرفه بس العرفانيين والروحانيين ، بحيث تنطيهم اسمك واسم امك ومن خلال علم الجفر والارقام الي تقابل حروف اسمك واسم امك راح يكولولك اسمك الحقيقي الي المفروض تتسمى بي
Name 2 : اگلك ، بشرفك مناوي تنتقل بالزمن وتعبر من القرن الثالث الميلادي وتجي للقرن مالتنه؟ بشرفك انتقل ، ترة القرن مالتنه بي خوش سوالف ، سوالف تلوگ لهذا الدماغ المغلف بالشمع الناتج من فضلات الديدان السنيغالية
بس فهمني هاي الخوارزمية منين جبتها؟؟
فهمني حتى تبرد نار كلبي وما أضطر اصيح الممرضة واخليها تضربك ابرة تگلبك فرس النبي
هسه انت تكول انه اسمي ياثر على سلوكياتي وافعالي ومستقبلي
وأذا ما أثر اسمي ، اذاً لازم اعرف اسمي الثاني الخفي ، عن طريق مجموعة من الكائنات الي تنتمي لشعبة (اللادماغيات) ، هذولة ياخذون اسمي ، ويحطون مقابيل كل حرف "رقم" ويسوون سلسلة من الحسابات الفنطازية ، ويكولولي اسمك الحقيقي (...)
منتاز ، هنا اسال بعض الاسئلة /
1- هل همَّ يعتمدون بسوالفهم على (الاسم) كما هو مكتوب لو كما يُلفظ؟
2- اكو هواية شعوب بالعالم لغتها مابيها حروف ، بيها رسومات ، هاي شلون رح يتعاملون ويه اسماء سكانها؟؟
3- منين اجتي هاي المعادلات الي يعتمدوها ؟؟ رح تكلي علم الجفر ، واني رح اكلك هذا اسمه علم {الحُفر} الي مبقينه مطمومين الى هذي اللحظة
4- نفرض انه اني بالهوية عندي اسم ، واهلي واصدقائي يصيحولي بغير اسم ،، هنا بهذا الوضع ، هذا الشفيّة شراح ياخذ؟؟ يا اسم؟
امدّاك انت ويا
Name 1 : بابا ، ماهكذا تؤكل الكتف ، مو كلشي لازم بي دليل ، اكو اشياء بالحياة اجوبتها موجودة بس بدون دليل ، هاي من ضمن الاشياء
لعد شتفسر حالات طلاق تصير لأسماء مكررة ؟؟
يعني مثلاً تفوت لمحكمة تلكه 7 طلاقات بين اسمين بس : نور وحيدر فرضاً
هاي كلها بسبب طاقة الحروف ، ماكو توافق بالطاقات
Name 2 : يابه ماكو ربط بين الاسم والسلوك ، وحق ساحة بيروت ماكو ربط ، يعني شلون يصير ربط بس فهمني؟ هي اسمها هالة ، وهو اسمه حسام ، ونفرض ان حسام راح لعرّاف او عرفاني او اي هذيان ، وگله : انت ماتتوافق وية هالة .... على يا اساس نفسي استند وكاللهم ماتتوافقون؟ لايعرف البنية ، ولا شايف اطباعها ، كل اليعرفه بس اسمها واسمك
شلون حكم على عشرتكم وعلاقتكم؟؟ جرابيع
Name 1 : عالعموم ، اني ما اتذكر وصلت لنتيجة وياك فد يوم ، مبروك على المولود ، وهاي هدية بسيطة بمناسبة گومة زوجتك بالسلامة
Name 2 : ماريد هديتك ، اني رح اهديلك كم مقال علمي يختص بهاي السالفة ، بس اقراهن ... وامسح قناة الديار ، مسح القناة اهم من قراءة المقالات
مرسلة بواسطة في ليست هناك تعليقات:

حقائق عن الشمس / درنفيسيات

والله ما ادري ، هو العيب بالشمس لو العيب بالسياسيين والشعب الي مناوين يشجرون البلد
= ماتشجّر ! اكو احد لازمك ؟
48ْ- مشجّر حديقتي ، يعني شسوي مثلاً ، اصرف عالحكومة يعني
= ثم تعال ، داعش اخذت ثلث البلد وانت حاير بالتشجير وحرارة الشمس ، والله بيك زلغة
48ْ- يلّه استحملني ، بطران ، وماعندي موضوع اسولف بي
گلت خل آخذ غيبة الشمس شوية
1- النظام الشمسي مالتنه بي كتلة ، كتلة مجرّية ، الشمس وحدها تمثل 99.86 % من اجمالي كتلة النظام الشمسي
2- نواة الارض مالتنا ، درجة حرارتها قريبة جداً لدرجة حرارة الشمس
3- بكل ثانية ، الشمس ترسل للارض نايترونات عددها يعادل 10 اضعاف عدد سكان الكوكب
4- كتلة الشمس جبيرة جداً ، جبيرة لدرجة انه نجمع مليار و300 مليون كوكب بحجم الارض ، يلّه يصيرن بكدها
5- العلم الامريكي الي خلوه الجماعة على القمر ، لونه هسه ابيض بسبب تخلخل اشعة الشمس بالألوان القماش مال العلم
6- 16 مليار طن من كتلة الشمس ، عبارة عن ذهب صافي منصهر
7- يستغرق كوكب بلوتو 248 سنة حتى يدور حول الشمس
8- حسب احصائية ضخمة وواسعة النطاق اجريت على الشعب الروسي
اتضح ان ثلث الشعب الروسي يعتقد ان الشمس هي الي تدور حول الارض (نيالها لأمك لينين)
9- چان اكو اعتقاد عند العلماء ان الشمس اكملت 20 مدار من اول ظهور الها بالكون ، وبعدين اتضح ، ان هي مكملة 1/1250 جزء من المدار منذ ظهور الانسان وليومك هذا (يعني الشمس تجري بحركة تكاد تكون غير معلومة السرعة ، بس الشمس تجري لمستقر لها : اش ، خل اكمل)
10- الشمس ممكن تحرگها لعينك ، حرق تام
11- يومياً ، النباتات تحول ضوء الشمس الى طاقة ، تعادل 6 اضعاف الطاقة الي تنتجها الحضارة البشرية
12- الشمس تبعد عن الارض بمسافة 400 مرة عن بعدها من القمر
13- اذا طلعنه بالفضاء ، فضوء الشمس رح نشوفه ابيض ، مو اصفر
14- تخيل الشمس والارض والمشتري ، متجمعين واحد بصف الثاني
تخيل احجامهن كالتالي :
الشمس = حجم كرم القدم الشاطئية
المشتري = كرة غولف
الارض = حبة بزاليا
15- كل الي نحتاجه من الطاقة ، نكدر نحققه وية 1/10000 من اشعة الشمس الي تسقط على الارض
16- درجة حرارة الشمس اكثر من 27 مليون درجة فهرنهايت = 15 مليون سيليليزية


مرسلة بواسطة في ليست هناك تعليقات:

صدر المراة / درنفيسيات




صدر المرأة
شلون متجيبه شلون متودي ، شلون ما تتغاضى عن وصفه
يبقى هو اول مثال
للأنوثة ، للحنان ، للأغراء ، للأمومة ، للجمال ، للأيثار ، للحميمية 
ولهواية شغلات حلوة بحياة الرجل ، وبحياة الانثى نفسها
هاي شوية معلومات علمية عن صدر الانثى :
1- سرطان الثدي هو اكثر سرطان شيوعاً بين النساء ، ولذلك ، المراكز البحثية كثفت الدراسات عليه ، من ضمن الدراسات الي وجدت بيها نتائج هي : قد تقل نسبة الاصابة بسرطان الثدي اذا واضبت الانثى على "عصر ودعك" صدرها بين فترة واخرى
2- معلومة شائعة بين النسوان ، تكول : الي صدرها صغير ، ما تنتج حليب
العلم يكول لا ، ماكو هيج فقمة تلعب جار اول ، كل احجام الصدور تنتج حليب
3- احصائيات تكول : ان الرجل الفقير يفضل الصدر الجبير ، والرجل الي حالته المادية زينة يفضل الصدر الصغير
4- صدر الانثى مامتساوي بالحجم ، دائماً الصدر الايسر اكبر من الايمن
"اهو غلاسة كدة"
5- يگلك بامريكا ، بنية وحدة من اصل 20 بنية ، تخلي صدر مزيف
(الثقة بالنفس 3%)
6- احصائيات تأكد ن ان الرجال الي عدهم احساس عالي بالابوة ويريدون يكونون اباء ، يحبون المرأة الي صدرها جبير
(يعني الفُقر والابوة هجمان بيت)
7- النساء الي يسوون عمليات زرع صدر ، يكونون اكثر عرضة للأنتحار
8- البشر ، همَّ الوحيدين من بين الرئيسيات (القردة والسعادين والشمبانزي) الي يملكون صدر ، اناث القرود يظهر عدهن الصدر لمن يولدن
ورة ميكبر الطفل وينفطم ، الصدر يتضائل ويختفي (سلايد روف)
9- حياة الرجل ، من الممكن ان تمتد خمس سنوات بعد ، بمجرد التحديق الدائمي بصدور النسوان ، وهذا الشي تقنياً
يعتبر : ان المرأة تمد الرجل بالحياة عن طريق {برتقالتي الوجود}
10- ما ننسى مسألة : 85% من نساء العالم يلبسن حمالات صدر غير مطابقة وية حجم صدرهن ، لو ضيگة لو مهبهُبة grin emoticon
المصدر بي حبشكلات +72 ، سمّي وفوت
مرسلة بواسطة في ليست هناك تعليقات:

شكل التكنلوجيا سنة 2025 / درنفيسيات



اكو قانون قننه (غوردون مور) احد مؤسسي شركة Intel لتصنيع الألواح الالكترونية بسنة 1965 ، هذا القانون يعتبر قانون اقتصادي خاص بالصناعات الي تستخدم السيلكون ، يُختصر بجملتين :
الاولى : كل سنتين تقل تكاليف الجهاز
الثانية : كل سنتين تزداد كفاءة الجهاز بسبب زيادة عدد الترانزستورات الداخله بتصنيع اللوح
حسب هذا القانون ، كدروا العلماء يخمنون شكل التكنلوجيا بعد عشر سنوات من هسه ، أَي ... شنو راح يصير شكل التكنلوجيا بسنة 2025
1- تكدر بسنة 2025 تشتري كومبيوتر ، يشتغل بكفاءة تساوي 10^16 دورة الكترونية بالثانية (10000 ترليون دورة بالثانية) ، يعني وحدة المعالجة المركزية مالته [CPU] رح تعادل وحدة المعالجة المركزية مال الدماغ البشري
2- العالم حالياً ديتجه لشي اسمه : The Internet of Everything
ومعناه / انترنيت كل شيء
انترنيت كل شيء هو عبارة عن ربط الاجهزة الالكترونية والناس والبيانات ببعضها ، بوقت واحد
بـ 2025 ، انترنيت كل شيء رح يربط اكثر من 100 مليار جهاز ، وكل جهاز بي درزن "مستشعرات" هي الي تمشي عمله وتنظم ترتيب المعلومات الداخله والخارجه منه
وبهاي الخطوة الجبارة رح يتم اقتصاد مليارين "مستشعر"
ورح يخلي تطور نقل البيانات والمعلومات فد شي فوق التصور ، هذا الحجي حسب آخر دراسة قامت بيها شركة سسكو للأنظمة الرقمية
3- سنة 2025 ، وبسبب انترنيت كل شيء ، ووجود ترليونات المستشعرات الي تنظم اعمال الاجهزة تلقائياً
رح تظهر (السيارات ذات التحكم الذاتي ، طائرات عملاقة بتحكم ذاتي ، كاميرات ذكية ، والكثير)
من خلال هاي القفزة التكنلوجية رح تكدر تعرف اي معلومة بأي مكان ومن خلال اي جهاز الكتروني او آلة
4- شركات مثل :
Facebook , SpaceX, Google , Qualcomm and Virgin
تخطط لتوصيل الانترنيت لكل سكان الكوكب "حُط خطين جوة مفردة كل"
تخطط ان توصل الانترنيت لكل سكان الكوكب بعدد (8 مليارات مستخدم)
وبسرعة 1 ميغا بايت بالثانية لكل فرد ، مو عن طريق المودمات الي يتم استخدامها هسه ، لا ، بل عن طريق سيرفرات اقتصادية توفر عشرات الترليونات من الدولارات
وبهذا الانترنيت رح يسوون خدمة اسمها : cloud 3D printing ، وهاي سالفتها سالفة ، ينرادلها منشور بوحدها
5- الجراحة الروبوتية وتنمية الاعضاء بواسطة التأثير الصناعي؟؟؟؟؟؟؟؟؟؟؟
زين ليش؟
ها ، كتلي
سنة 2025 الجراحة مايقوم بيها الطبيب ، العمليات الجراحية رح تعتمد على الروبوتات (الانسان الالي) وبأجور زهيدة جداً
والله والنعم ، ماكو طبيب يجي ويفيك عليك ، ويرفع سعر وينزل سعر
اما بالنسبة لتنمية الاعضاء البشرية ، فسنة 2025 رح تنصنع بيها اجهزة عالية التكنلوجيا ، تخلي الاعضاء تنمو بيها عن طريق التأثير الصناعي
يعني القلب المتضرر اذا تدخله بهذا الجهاز ، يرجع طبيعي وينزرع مرة ثانية
الكلية المتضررة كذلك
الطحال والكبد والبنكرياس كذلك
يعني من يتلف عندك عضو ، مرح تضطر ان تنتظر واحد يموت حتى تستبدل اعضائك ويا ، يعني كل واحد ماخذ بالو من لغاليغو
6- الشاشات الي شايفيها ونشوفها
شاشة التلفزيون ، شاشة الموبايل ، شاشة اللابتوب ، شاشات الاجهزة الطبية
هذني كلهن رح يختفن بدخول سنة 2025
ورح يتم استبدالهن بنظّارات ، مو من هاي النظّارات مال Google لا ، وانما نظّارات بيها آلآف الموديلات الي تتماشى وية الملابس والهيئة
هاي النظارات ممكن تعوضك عن مشاهدة اصفى شاشة Full HD ، ومن خلالها رح تكدر تباوع حتى عالملائكة
7- اكو فلم يشگ شگ اسمه Her
الي شايفه خير على خير ، والي ماشايفه فراح اذكر منه جزئية بسيطة
الجزئية : بطل الفلم يطلع يسولف والحاسوب مالته ، والحاسوب يجاوبه
يگلّه مثلاً /شنو الايملات الاجتني اليوم ؟ والحاسوب يقرالهيا
يكله اوكي ، اغلق نفسك وروح
هاي الجزئية رح تتحقق بسنة 2025 على ايد شركة IBM والي صارلها ما اعرف كم سنة دتشتغل عليها ، وهي جزئية الذكاء الصناعي
المحاكاة الحاسوبية
.............................................................
العالم وين رايح يمعودين ، العالم متجه نحو الطمأنينة والسلام بفضل العلم
واني خايف لا تجي هاي سنة 2025 ، والگه العراقيين بعدهم "ينگبرون" بالتاريخ وبالأحقيات
يلّه ، عاتي
http://bit.ly/1RN2aNe
مرسلة بواسطة في ليست هناك تعليقات:

اسئلة الاطفال - الجزء الثاني / درنفيسيات




* الموضوع الي رح اتناوله يستلزم استعمال المفردات كما هي ، وبواقعية بعيده عن التشفير و التبطين
الي يستحي/تستحي من وجود هاي المفردات ، اتمنى ان ما يقراه
@$#- بابا اني شلون طلعت من بطن امي ؟
بابا ليش اني ابول واني واكف واختي تبول وهي كاعدة؟
بابا اني خايف لا فد يوم اكعد من النوم والكه "بلبولي" ماكو واصير مثل البنات !!
ماما هو اني شلون صرت ابّطنچ؟
ماما منو حطني هناك؟
~~~~~~~~~~~~~~~~~~
بأي وقت ، من عمر السنتين ونص فما فوق ، انتَ كأب وانتِ كأم معرضين لهذي الاسئلة تعرض مباشر
والسؤال الاكثر شيوعاً من بين هاي الاسئلة الفوگ هو : اني منين اجيت؟؟
علماء النفس يأكدون على ان افضل اجابة لهذا السؤال شوكت مچان ووين مچان ، والي راح يتكرر طبعاً من الطفل ورة يوم او يومين بسبب نسيانه
هو :
حبيبي انت اجيت من بطن امك ، واكو شي بداخل بطن امك اسمه (رَحَم) انت عشت هناك لفترة 9 اشهر وطلعت من الرحم عن طريق فتحة اسمها (المهبل)
وشلون صرت اصلاً ؟ صرت من خلال ابوك وأمك ، مو بس امك ، يعني اكو جزء من ابوك انخبط وية جزء من امك وانت صرت
الي يقرا هذا الجواب رح يرفضه طبعاً ، خصوصاً مجتمعاتنا الي تنظر لهاي الاسئلة بتحسس وتوضعلها تابوهات مالها اول ولا آخر
بس عبر عدة دراسات حول هذا الموضوع ، اكدت ان المصداقية باستخدام المفردات الصحيحة الخاصة بالاعضاء وية الطفل مثل "قضيب، مهبل، خصيتين، صدر، شرج، رحم"
رح تخلي الطفل يتعامل وية هاي المفردات ببساطة وسهولة وما تثير بداخله اي نوع من الارتياب او التوجس منها الى ان يكبر ويتعرف عليها وعلى تسمياتها {الشوارعية} ، لان تعرّفه على الاسماء الصحيحة للأعضاء رح يزرع بذهنيته ان هي اعضاء حالها حال الايد والرجل والراس ، بس اكو فرق بسيط عن باقي الاعضاء
انه لازم تتغطه دائماً ، والحديث عنها دائماً مو ضوروري
مثل ما الحديث مو ضروري دائماً عن الايد والرجل
طبعاً الة التفكير الجنسي عند الطفل ما تجي ورة السنتين ونص ، لا
تجي من الولادة ، من اول ملامسة بين شفايف الطفل وحلمة الصدر حسب كلام الحاج سيغمويند فرويد
بس بعدين "عند تشكلات الوعي" البدائي للطفل ، تبدي هاي الاسئلة أتدگ باب وعيه
وبأكثر المواقف الي يسأل بيها الطفل هاي الاسئلة هي بالحمام ، من "يقضي حاجته" او عند الغسل
لجعل هاي المسألة ما تاخذ حيّز من تفكير الطفل ، ينبه علماء النفس على مسألة جداً مهمة وحلوة
وهي : وضع الاطفال في تجمعات تتيح الهم ان يظهرون عرايا "مثل المسابح" ، حتى ياخذ فرصة بالتعرف على اجساد اقرانه من البنات والولد الي بعمره ، والأسئلة بخصوص الاعضاء ما تاخذ مساحة من تفكيره
لأن يبدي يشوفها مسالة حييييييل طبيعية
وحذاري من الاجوبة التالية :
1- بابا اني شلون صرت ابطن ماما ؟ حبيبي ماما جانت تاكل هواية وانت صرت
2- بابا اني شلون صرت ابّطن ماما ؟ حبيبي ماما اكلت بذور وشربت وراها كلاص مي وانت صرت
3- بابا اني شلون طلعت من بطن ماما ؟ حبيبي انتَ طلعت من (سرّتها)
الجواب الاول اذا سمعته البنت ، ممكن يؤدي بيها للسمنة ، لان بطبع البنت تكون مقلدة لأمها ، وترغب ان تمر بتجربها ، فالبنت رح تاكل هواية على امل ان تصير حامل
اما اذا سمعه الولد ، فراح يخاف وما ياكل ، لأن رح ينبني بداخله هاجس مخيف ان ممكن ان يكون حامل ، بس بنفس الوقت عرف ان الحمل خاص بالنساء
الجواب الثاني رح يخلي يروح يحجي وية النباتات بأعتباره يتشارك وياها بنفس خصائص الولادة ، وهذا خطأ ، هيچ الجواب يسببله صدمة بالمستقبل
الجواب الثالث رح يخلي الطفل يتسائل بمرور الزمن
شلون اني بهالحجم واطلع من مكان ضيّگ كلش؟؟
كأهل ، گولوله منين طلع "بتسمية صحيحة" وفضوها
~~~~~~~~~~~~~~~~~~
تقريباً هي هاي اهم النتائج الي توصللها علم النفس العائلي او المجتمعي بخصوص هذي الاسئلة ، ووجوب افهام الطفل بالجنس وفق التسميات الخاصة ، مو الشائعة ، حتى تلقائياً يكون مهيأ لفهم هذي الاعضاء وماهيتها بحياتنا مستقبلاً
وهم بوسولي اطفالكم
وأتمنالكم وإياهم الصحة والسلامة
مرسلة بواسطة في ليست هناك تعليقات:

اسئلة الاطفال - الجزء الاول / درنفيسيات



@$#- بابا هو جدو شلون مات ؟
زين جدو وين راح من مات ؟
زين وبيبي؟ منو موتها ؟ زين هذا الي بافلام الكارتون ليش ميموت واحنه نموت ؟ بابا يصير اتحول لافلام الكارتون حتى ما اموت ؟
بابا بابا - ها حبيبي
هو شنوة الموت ؟؟
~~~~~~~~~~~~~~~~~
كم هائل من الاسئلة يسألها الطفل يومياً
طبعاً ، شي بديهي جداً ونتاج تطوري ، غريزة الفضول تطغى عليه وتكون راكبته من راسة لاخمص قدمه
احنه هم ككبار ، لو نسافر لفد كوكب وبي كائنات كلشي ما نعرف عنها
اكيد رح نسألهم الاسئلة البديهية الي همّ متجاوزيها
احنه نسألها بسبب غريزة الفضول المعرفي
بس!!!!!!! من الاسئلة الي يكررها الطفل بطفولته ، هي الاسئلة الي تخص الموت
هنا ، على شنو لازم الاهل يعتمدون بالجواب على اسئلة الموت؟
هل التغليس يجيب نتيجة؟ "ابسلوتلي" لا
هل تزييف الحقائق للطفل رح يشبع فضوله؟ بالتأكيد لا ، والف لا ، راح يتأزم عنده الوضع
لذلك ، اكو بعض الدراسات تنطي نتائج نمطية يكدر اكثر الاهالي يستعملوها مع هيج اسئلة
اول شي ، لازم نعرف ان الاطفال ماعدهم اي معيار لأهمية المعلومات الي يستقبلوها
يعني مثلاً : الطفل يسأل سؤال ثگيل ، وانت كــ أب تحاول ان تجاوب على سؤاله بشرح وافي ...... هنا خلّي ابالك ، ان الطفل راح ياخذ معلومة او معلومتين من كل المعلومات الي انطيتهيا حول سؤاله
لأن هو ميعرف اصلاً ان سؤاله هذا ثكيل ، وسبب ثاني هو ذاكرته الي بعدها ما ناضجة لأستقبال اكثر من معلومة بوقت واحد
فهنا شتسوي/شتسوين ، حاول ان تختصرله الجواب ، وتجاوب على سؤاله بأختزال
لأن اول وتالي بعد كم يوم رح يرجع ويسأل نفس السؤال
ثاني شي ، التكرار ثم التكرار ثم التكرار
الطفل يميل لترسيخ الحقائق الي يسال عنها ، ومهمتك هنا شراح تكون ؟؟
رح تكون شبيهة بمهمة القطّارة ، تقطّرله المعلومات تقطير بكل مرة
مثلاً
*بابا اني شلون كبرت؟ جوابك رح يكون : بابا بسبب شربك للحليب
ورة يومين هم ينعاد السؤال ، والي عليك ان تجاوب بنفس الجواب + ان تضيف : بسبب الحليب والسيريلاك
وورة ثلاثة ايام كذلك ، واجابتك كذلك
الى ان تترسخ هاي المعلومة
من خلال هاي النقطتين شنو الي اتضح؟
اتضح ان الطفل يحتاج منك شوية صبر ومطاولة ، وتمرّس على الأجابات المكررة وبنفس المفردات
نجي هسه لمعضلة : سؤال الاطفال عن الموت
الاطفال ، كل الاطفال ، يلاگون صعوبة بفهم الموت
والمصيبة .. ان الاباء يلاكون صعوبة بشرح الموت اكثر من الصعوبة الي يلاكوها بشرح الجنس للأطفال
علماء النفس يكولون : (انه لمن المخزي "من الاهل" اخفاء حقيقة الموت عندما يسأل الطفل عنه ، والقول بأنه لن يأتي الينا)
يجي علم النفس العائلي او (المجتمعي) يقدّم بعض الاجوبة عن هذا السؤال ، وكيفية تمرير الاجابة ، والاستفادة من المواقف
ينصح العلماء باستثمار المواقف الي يصير بيها موت
مثلاً / اذا انتَ مربي طيور ابيتكم او حيوان اليف ومات ، فضروري تستغل الموقف وتمهد للدخول حتى لو ما سالك ابنك او بنتك
تكدر تنتهز الفرصة وتسولف للطفل حول ان الكائنات (النباتات الحيوانات البشر) تعيش بفترات زمنية مختلفة ، وان الموت هو مسألة طبيعية جداً تمر بيها كل الكائنات ، وتسولف على مسألة تحلل الاجساد الميتة ورجوعها للمادة الاولية للكون ، وتركز على مسألة ان الي يموت ما يرجع
حاول تبسط المسألة بأذهانهم بعبارات بسيطة وغير معقدة
مثل : الوردة الي تموت بعد ما ترجع تنمو ، الكلب الي يموت بعد ما ينبح ولا ياكل ولا يلعب
وحاول ايضاً من خلال القصص وافلام الكارتون ان تستغل الموقف وتشرح للطفل ،،، وبما انه بأفلام الكارتون دائماً يطلعون (الشرير) هو الي يموت
فهنا راح يتسرخ بعقل الطفل انه الموت يجي بس للشر
وهذا ترسيخ خاطئ ، حاول تأكدله للطفل ان الموت يجي للخير وللشر
حتى ما يصير عنده ازمات نفسية من يكبر ويعرف انه اكو خيرين ديموتون
حذاري من الأجوبة التالية :
1- بابا ، جدو من مات وين راح؟؟ حبيبي جدو صعد فوك للسما
2- بابا ، جدو من مات وين راح؟؟ حبيبي جدو نايم هسه بغير مكان
3- بابا ، جدو من مات وين راح؟؟ حبيبي جدو سافر وبعد ميرجع
الجواب الاول راح يولّد بذهن الطفل تساؤل ثاني ، وهو : اذا جان الموت هيج مريح ويصعّد جدّي للسمه ، فليش اهلي حزنانين؟ المفروض مايحزنون ، اذاً الموت شي سيء وهمّ مديكولولي
الجواب الثاني راح يخلي الطفل يخاف من النوم ويسببله ارق مؤقت
لان يكوم يخاف من النوم عباله هم رح ينام مثل نومة جدّه الطويلة
الجواب الثالث رح يخلي بذهن الطفل امل برجوع جده من السفر
وهذا امل كاذب ، والكذب على الطفل بهذا الموضوع غير مجدي حسب قول علماء النفس
~~~~~~~~~~~~~~~~~~
تقريباً هي هاي اهم النتائج الي توصللها علم النفس العائلي او المجتمعي بخصوص هذا السؤال ، ووجوب افهام الطفل بالموت كما هو
حفاظاً عليه من الصدمات النفسية
الجزء الثاني / اسئلة الاطفال حول الجنس
بوسولي اطفالكم واتمنالكم وإياهم الصحة والسلامة
مرسلة بواسطة في ليست هناك تعليقات:

حقائق عن العين البشرية / درنفيسيات


عيناكِ
الدمع الاسود فوقهما يتساقط انغام بياني
عيناك وتبغي وكحولي والكاس العاشر اعماني
العين وما ادراك ما العين 
1- العين البشرية تكدر تميّز 10 ملايين لون مختلف
2- الي عيونهم زرگ عدهم تحمّل عالي للكحول
3- اذا تحول العين البشرية الى كاميرا رقمية ، فراح تنطيك رؤية تساوي 576 ميگا بيكسل
4- كل البشر الي عيونهم زرگ حول العالم ، يرجعون بالاصل لشخص چان عايش قرب البحر الاسود قبل 10000 سنة (ذاك اليوم)
5- شايفين اول ما نكعد من النوم ؟ واحدنه لو يبقى مغمض عيونه فترة
لو يظل يرمش حتى يهيأ العين لاتسقبال الضوء
هاي الفقرة تاخذ من ساعات الاستيقاظ تقريباً 10% على طول حياتنا واحنه مستيقظين
6- السمك الذهبي ميغمض عينه لأن ماعنده جفون
7- عين النعامة اكبر من دماغها
ههههههههههههه اكول ليش يكولون (لا يا دماغ النعامة ، طلعت حقيقة علمية)
8- اكو لعبة الكترونية اسمها TETRIS هاي تشبه كاندي كراش بس قديمة تصممت من سنة 1985 ، الفيكة مالتها : مكعبات ملونة تنزل وانت ترتب الالوان سوية حتى تفلش القاعدة
الباحثين استخدموا هاي اللعبة بمعالجة الناس العدهم "العين الكسولة"
هذولة الي عيونهم نص مغمضة ونص مفتوحة
9- عيون الشيخ البرت اينشتاين الجماعة ضاميها بصندوك بنيويورك
10- قرد الليمور الاسود ، والي يعتبر من الرئيسيات ، والي يملك سلف مشترك وية الانسان ، هو الوحيد الي يشترك وية البشر بطفرة العين الزرقاء
11- الحرباء ، ممكن ان تحرك عيونها بأتجاهين مختلفين بنفس الوقت
12- النحلة عدها خمس عيون (فلك طرّچ)
13- العيون الزرگ ، تميل لأن تكون اكثر حساسية للضوء
14- الكلاب تشترك مع البشر بخاصية ماموجودة بباقي الكائنات
وهي ان ثنينهم يكدرون ينطون تلميحات بصرية (الغمزة) لبعضهم
15- الدولفين ينام بعين وحدة ، ويبقي الثانية مفتوحة
17- بعض السحالي ، تخلي عيونها تبخ دم حتى تخوف الحيوانات المفترسة (ياسبحان التطور)
18- البزازين والعتاوي ، عدهن 3 جفون
19- من المستحيل ان تكدر تعطس وعينك مفتوحة
20- الــ "أومّاتوفوبيا" : نوع من انواع الفوبيا ومعناه الخوف من العيون
او كما يقول العظيم مظفر النواب : جفنك جنح فراشة غض وحجارة جفني وما غمض

مرسلة بواسطة في ليست هناك تعليقات:

تغيير الاراء وتاثيرها على الدماغ / درنفيسيات


1$@- والله خبلتني ، انت شنو سالفتك رحمة لقناة الجيش
بين فترة وفترة الگاك مغير رأيك حول فكرة معينة ، يمعود اصفالك على راي خل الواحد يعرف شلون يتعامل وياك
~.~.~.~.~.~.~.~.~.~.~.~.~
هاي الجملة الفوگ ، واحدنه يسمعها يمكن الله لا يچذبني اكثر من عدد المرات الي انقتل بيها شاكر وهيب وعزت الدوري
بكل وقت وبكل مكان نسمعها ، بالشغل ، بالفيس ، وية چاي العصر ، بالكهوة .. الخ من الاماكن الي نلتقي بيها وية عالم نعرفهم ويعرفونه
قبل لاندخل بالغميج، لازم نتفق على بديهية واضحة احتاج أذكرها ، وهي ان : تغير الاراء حول الامور الي يتم مشاهدتها وتقييمها ، امر صحي جداً
وايضاً تعتبر حالة "حيوانية" سليمة : وما اقصد بالحيوانية بمعناها الدارج وانما بالمعنى الي يتطابق مع التصرفات الحسية للحيوانات
حالة تغيير الاراء والافكار اذا دلت على شي ، فأنها تدل على ان الانسان الي ديغير رأيه حول مسألة بين فترة واخرى ، معناها هذا ديشغّل عقله وميبقي راكد ويستلم من المحيط مالته كل المجريات على انها مسلّمات
تبقى مسألة هي صلب الموضوع
ليش تغير فكرتك او رايك ؟؟
وشوكت لحظة تغير الرأي او الفكرة بالضبط ؟؟
طبعاً سؤالين عنيفين ويحتاجلهن "عصير كرّاث" يلّه الواحد يبلش بيهن
بس يله ، أجاوب بدون الكرّاث
جواب السؤال الاول يرجع لنظرية التطور طبعاً grin emoticon ، شلون يا بعد خالتك الشگرة؟؟
شوف حبيسي
حالة تغيير الفكرة والرأي يقارنها العلم وية خانة چبيرة ، وهي : الانقراض او البقاء
الانقراض يجي بسبب العادات والتقاليد المتراكمة على طول الخط الزمني "العرضي" لمجموعة كائنات تتعايش مع بعضها وفق مفاهيم غير قابلة للتحديث ((ابد ابد ، مدا اقصد الشرق الاوسط ولا الامّة العربية المجيدة))
الخلاصة : الاراء لا تتغير = انقراض عاجلاً ام آجلاً
البقاء يجي بسبب العادات والتقاليد المتراكمة على طول الخط الزمني "العرضي" لمجموعة كائنات تتعايش مع بعضها وفق مفاهيم تتغير عند ملاحظة اخطار قد تتسبب بهلاك المجموعة ((ابد مو قصدي دول العالم الاول والثاني الي غيرت من فهمها للحياة حتى توصل للي وصلته هسه))
الخلاصة : الاراء تتغير = بقاء وتكيّف
من الاخير
ارائك وقناعاتك بالامور الي تخص الحياة تتغير على الدوام
معناها انت تريد تعيش وتواصل طريقك بالحياة
ارائك وقناعاتك بالامور الي تخص الحياة قافلة وماتتغير
اذاً انت كائن مستهلك للاوكسجين فقط ، وبصراحة وجودك يمثل عبئ كبير على الكوكب
السلام على التطوّر يوم ولد ويوم يصف لنا كل شيء
اما السؤال الفستقي البندقي الي هو : شوكت لحظة تغير الرأي او الفكرة بالضبط؟؟
فهذا السؤال ارهق هواية فلاسفة ابتداءاً من "ارسطو" لحد "كانت"
والي يتمحور حول الارادة الحرة ، وتصويب الراي نحو الصحة http://bit.ly/1e2BTfR
اجه العلم التجريبي
وجايب ويا باحثين من جامعة ستانفورد http://stanford.io/1zxEnMj
كدروا يرصدون ولأول مرة بالتاريخ التغيرات الي تصير بالدماغ بلحظة تغيير راي معين عن طريق الاشارات (اللحظية) الي يرسلها الدماغ بأجزاء من الثانية بواسطة اختبار القرود
يلزيز يرايء
هذولة كعدوا بالمختبر ، وجابو قرودة ، وخلّوا كدامهم متاهة بسيطة
وبنهاية المتاهة اكو اختيارين (نتخيلهن لعبتين)
الطرق الي تودي للأختيارات يكدر القرد يوصللها عن طريق تحريك اصبعه بداخل المتاهة ، يعني يحط اصبعه بالمتاهة ويظل يمشي بي الى ان يوصل للأختيار الي هو راده
العلماء شسوو؟ اول شي ركبوا اجهزة قياس نشاط الدماغ
والي من خلاله يكدرون يقرون الترددات الي تطلع باللحظة الي يريد بيها القرد اختيار لعبة معينة
القراءات الي ظهرت ، ظهرت بصورة نموذجية جداً من العلماء عافو القرد يختار براحة بدون اي ضغط خارجي ، بشكل ممتاز ومكرر
بس !!!!!
اجه احد العلماء اسمه ماثيو كوفمان ، هذا شسوة ؟
هذا خلّه ايده على احد الاختيارات الموجودة بنهاية المتاهة
واجبر القرد على اختيار واحد
فشاف ترددات صنع القرار والراي الي طلعت بالجهاز ، مو نموذجية
مما يدل على الآتي :
عند وضع القرد في اختبار قسري ... رح يتولد بداخله رد فعل يخلي يتردد بقبول هذا الاختيار ، والي رح يتعارض مع الارادة الحرة الموجودة بي مثل ماموجودة بباقي الكائنات
بعد ان تم رصد اللحظة الي يتغير بيها العقل حول فكرة معينة
احتفلوا العلماء ، وجابوا عصير داليا وبسكت شمائل
وكالوا : هاي التجربة رح تفيدنه بالمستقبل بمسالة ربط الاطراف الصناعية مع الوصلات الكهربائية ، والقدرة على تحريكها بواسطة الدماغ
مع السلامو عليكو
مرسلة بواسطة في ليست هناك تعليقات:

ليزر خارق / درنفيسيات


يوم ورة يوم ، الخيال العلمي الي بالافلام يتحول الى حقيقة
معظمنا شايف حرب النجوم او افينجر او كابتن اميريكا 
واقصد هذني الافلام الي يستخدمون بيها اسلحة ليزر "ماحقة حالقة"
هذا الليزر بعد خمس سنوات من 2015 رح يكون حقيقي
لا .... بل اقوى من الليزر الي نشوفه بالافلام باضعاف
رح تكون قوته تساوي بالضبط مقدار الأشعة الناتجة من انفجار نجم معين بالفضاء ،،، يخراشي
ايوا كده
خل ندردش شوية بسالفة انفجارات النجوم والاشعة المنبعثة منها
النجوم من تنفجر ، تولد بأنفجارها نوعين من الجسيمات
الجسيم الاول هو : مادة الالكترون
والجسيم الثاني هو : المادة المضادة للبوزترون
المادة والمادة المضادة بالانفجار النجمي
يصير الها خصائص متشابهة نوعاً ما
واهم خصيصة هي تساوي الكتلة ، بس !!!!
هاي شحنتها سالبة وهاي شحنتها موجبة
اثناء تصادمهن (اقصد المادة والمادة المضادة) ينتج نوع من انواع الاشعة اسمها : اشعة گاما gamma rays ، هي هاي الأشعة الي تنتج من الانفجار النجمي
وهاي حبشكولة على سالفة تكون اشعة گاما http://bit.ly/1JL53vp
الجماعة بمختبر لورنس ليفرمور الوطني http://1.usa.gov/1FJwlxt
طخ براسهم الّا يسوون مثل هاي الاشعة
جابو صفائح رقيقة من الذهب ، ووجهوا عليها حزمة اشعة ثقيلة التركيز
بعد تسليط الاشعة ، ظهرت فقاعات ناتجة عن تسليط الاشعة
الفقاعات الي صدرت من الاشعة ، ظهر بيها مادة ومادة مضادة
ونتج اشعاع گاما من هاي الفقاعات
يعني القضية مفستقة وملوزة ، بس يحتاجلها شنو ؟
يحتاجلها التجريب على غير معدن ولحد الان بس الذهب هو الناجح بالاختبار
القضية هنا تعتمد على كمية الاشعة ونوع المعدن
وما اعتقد تصعب عليهم ، لأن ذولة سوالفهم متخلص
محدثكم من قلب اشعة گاما devil emoticon
تعال اقرا عن تجربة الليزر "كاملة" ياحلو grin emoticon
http://1.usa.gov/1I2pT55
مرسلة بواسطة في ليست هناك تعليقات:

دموع النساء / درنفيسيات



$0h - cry emoticon cry emoticon cry emoticon cry emoticon cry emoticon
$%7- والله خبلتيني ، شنو عندچ جدول مال بچي بين فترة وفترة لازم الگاچ تولولين؟ والنوب على سوالف متستاهل ، كلش متستاهل
لو ماخذة درجة ناصية بالامتحان ، لو اخترعتي من شفتي ابو بريص ديلعب سكواش بالغرفة ، لو الحُمرة خلصت ، لو لأن اجتچ الدورة
شطلعت هاي ، وفوكاها تضوجون حضرة جنابكم من يجي واحد ويكول دموعكم دموع تماسيح .... احجي ، اليوم شكو ؟
$0h - ترة السالفة مو بيدي ، شسوي يعني اذا دمعتي سريعة
قابل بكيفي؟ لو عندي عَقد وية الغدد الدمعية !!
اني اتأثر بسرعة ، هذا ماجنيناه من التطور
$%7- اي ياعيني ميصير على اقل شي وطگيتيها ابّچية ، شوية الزمي نفسچ
$0h - مو كتلك مو بيدي ، هي صحيح تضوج مرات ، بس فعلاً مو بيدنا
احنه البنات عاطفتنه اكثر ، واكثر من دراسة تأكد على ان احنه نتأثر (بالنقد) اقوى من تأثركم بي ، ودراسات تخص البايلوجيا والهرمونات
$%7- اوكفي اوكفي ، خل اتربّع ، اي بالله انطلقي خل نفتهم شنو السالفة !
$0h - شوف ، الموقع الجغرافي كلش مؤثر بمسالة البكاء
وهاي السالفة لاحظها عمو دارون من زمان ، وكتب بمذكراته انه البكاء بالمجتمعات الغربية اقل شيوعاً من البكاء بباقي المجتمعات
وبعد اكثر من 70 سنة ، صارت احصائيات بهنغاريا وبأمريكا
اثبتت ان الرجال والنساء الي يبجون بأمريكا عددهم ضعف النساء والرجال الي يبچون بهنغاريا ، والدراسة عود ادزلكياها عالفيس http://bit.ly/1Mzf9P4
$%7- اوكي ، لهنا حلو ... بس البيئة وحدها مو كافية حتى تفتحون البوري مال عيونكم باي موقف يصير
$0h - لتستعجل على رزقك ، اكو منظمة عملاقة مقرها بهولندا هاي تهتم بالبحوث العلمية الي تخص ثقافات الشعوب
رصدت هاي المنظمة مسالة مهمة ، وهي : نسبة بكاء النساء الي تعيش ببلدان تحتضن حرية التعبير مثل امريكا واوربا وبعض الدول الافريقية (قليلة)
مقارنة مع البلدان الي انظمتها قمعية ، يعني النساء بداخل البلدان الي بيها انظمة قمعية يكونن كثيرات البكاء ، واعتقد اني ما عايشة ببروكسل
اشو هياتني مكابلتك وكاعدة ، http://bit.ly/1Mzf9P4
$%7- مفيش مشكلة لحد دلوئتي ، بس احس اكو نقص بعد بسالفة البچي ... القضية مو بس قضية بيئة وانظمة ،، احس اكو (تفياك) بالموضوع
$0h - هذا احساسك واحساس الملايين من الذكور خاطئ ، ويدل على عدم فهمكم النا
شوف ، بالاضافة لكل ما سولفتلك بي ، اكو هرمون بالموضوع
اي نعم ، هرمون اسمه [البرولاكتين] ، هذا موجود بيّه وبيك
بس بيّه ، نسبة [البرولاكتين] عالية ، وتوصل للـ 60%
والدموع العاطفية الي تشوفها انت وغيرك تنزل بسرعة بالمرأة ، احد اسبابها هذا الهرمون ، وهاي الدراسة http://bit.ly/1JMFI5Q تؤكد على صحة ادعائي
وسبب عدم بكائكم "بكثرة" مثلنا ، هو ارتفاع مستويات هرمون التستوستيرون ، لأن حسب اخر دراسة صارت على مصابين "سراطان البروستات" والي يخفض من مستويات هرمون التستوستيرون
اثبتت ان المصابين كثيروا البكاء ، بسبب فقدانهم هذا الهرمون
وهاي الدراسة http://bit.ly/1QVW8I7
$%7- ورة هاي الحوارية الصارت هسه ، اذا الگاج فد يوم دتضحكين
ثقي اوزعج ثوابات عالجيران
$0h - cry emoticon دوخر مني هسه ، اريد ابجي براحتي
$%7- والله بيچن هولوكوست
مرسلة بواسطة في هناك تعليق واحد:
الاشتراك في: الرسائل (Atom)