لماذا اليد اليمنى هي السائدة؟؟ / درنفيسيات

=اكل باليمنى بابا ميصير هيج

&#-بابا ما اكدر ، غير اني اجيت للدنيا يسراوي ؟

=حبيبي ميصير ، عوّد نفسك تاكل باليمنى ، الأكل باليسرة مكروه وغير محبب

&#-هسه قابل اني مختار اصير يسراوي يا حجيّ ، غير هي جينات توارثتها منك ومن امي ، وهاي الجينات انت متوارثها من بيبي وجدو

=انعل ابوك لابو الجينات لابو مندل لابو علم الوراثة ، انت تريد تطير النعمة من هالبيت ؟

&#-بابا ليش تطب عالقوائم وتخلص الرصيد؟؟ يانعمة الي رح اطيرها اني ؟ يعني مسكة الخاشوگة باليسرة رح تطير نعمة بيت بحالها ؟ استرخي يا ابتاه ارجوك

=اي طبعاً تطير النعمة ، وشايفها كدامي واجدادك واجداد اجدادك مسولفين بيها وصايرة كدامهم هم

&#-اي بابا اجدادك واجدادي محاسبيها صح ، ومسامعين بالسائد والمتنحي الي يختاره الانتخاب الطبيعي

=بابا يا انتخابات ؟ المالكي وانطاها وخلصت الانتخابات ، وين فوتتنا !!

&#-لا بابا اقصد الانتخاب الطبيعي بأثر التطور على طول 3.7 مليار سنة

=دكوم جيبلي باكيت جكاير غمدان ، انت اليوم ناوي تجلطني ، سد الموضوع واكل باليمنى

&#-بابا عوف الغمدان لتدخنها بعد ، لان ريحتها تشبه ريحة صندل يابس وديحترك
وما اسد الموضوع ، خل اسولفلك
اليوم ، نسبة وجود اليسراويين بالعالم هو 1 : 10 ، يعني من كل عشر اشخاص بالعالم اكو واحد يسراوي ، وتحديد اليد بالنسبة للانسان تتم برحم الام
يعني من قررتوا انت وامي تنجبوني (في الليلة اياها) وتكونت برحم امي ، كدر العلم ان يتنبأ بانه اني يا جزء من جسمي رح استعمل [حسب موقعي بداخل الرحم] اذا كنت ماخذ الجهة اليمنى من الرحم فأني رح اكون يمناوي ، واذا اليسرة فرح اكون يسراوي ، واكو مئات الادلة التطورية تدل على ان 10% من البشر الي عاشوا قبلنا كانوا يسراويين عن طريق مقارنة عظام اليد مالتهم

=اوكي وليدي ، لعد ليش اغلب الناس هم اليمناويين؟؟

&#-هو هذا السؤال الي جنت منتظره منك ، ليش اغلب الناس يمناويين ؟
شوف بابا ، رح اسولفلك بس مو تروح لأمي وتظل تهوس يمها وتكوللها "ابنج يكول اصلنا قرود"؟؟ ترة مو هيج السالفة

=هو غير يسولف القرد ابن القرد

&#- هههههه حجي السكر والضغط حجّي على كيفك
شوف ، اكو عدة نظريات تشرح قضية وجود (يد سائدة) ، بس اكثر النظريات العلمية الي تنطي وصف مقنع لوجود اليد السائدة ، هي نظرية المحاكاة الرياضياتية

=وهاي شتكول؟

&#-هاي تكول ان الانسان البشري بعد ما انفصل من الرئيسيات " Primates" طب بمراحل
هاي المراحل اطلقوا عليها : الضغوط التعاونية والضغوط التنافسية
هاي الضغوط شنو سالفتها؟
نجي عليها وحدة وحدة ، الانسان من ظهر ، كان لازم عليه ان يقاتل الحياة من اجل البقاء ، اليد اليسرى بطبيعتها قوية ، فالأنسان اضطر أن يستخدام ايده اليسرة من اجل الحروب والصراعات الي من خلالها يكدر يحصل على قوت يومه ، ولذلك تشوف الملاكمين الي يستخدمون اليد اليسرى تكون ضربتهم قوية ، لاعبين التنس الي يستخدمون اليد اليسرى ضربتهم قوية ، وكذلك بالخط
فهنا، تبزغ الضغوط التنافسية الي طرأت على الانسان والي خلته يستعمل اليد اليسرى
اما اليد اليمنى ، فهي تمثيل تام للضغوط التعاونية ، الضغوط التعاونية واضحة
هي المساعدة ، العمل بكل صوره الخ الخ

=عاشت ايدك ، اقتنعت

&#-لالالا ما اصدك حجّي ، ضدك تحجي ؟؟ معقولة شخص من مواليد الخمسينات يقتنع بالعلم ؟

=لايا طايح الخظ ، شبينه لعد ؟

&#-شمدريني حجّي اشو معظمكم قافلين
وبهاي المناسبة السعيدة ، ابدال ما تتفرج على الاخبار ، اشربلك جاي ، واخذلك فرّة بهاي المصادر
http://journals.plos.org/plosgenetics/article…
http://www.nature.com/mp/journal/v12/n12/abs/4002053a.html
http://www.rightleftrightwrong.com/theories_genetic.html