الجين الليبرالي / درنفيسيات

‫#‏الجين_الليبرالي‬

هاي بالـ 2010 ، طلعوا علماء من جامعة سان دييغو "كاليفورنيا"
ومن جامعة هارفارد
كالو : يابه ، باركولنه ، وجيبولنه خشّابة حتى نحتفل ، لان وجدنه جين يفسر سلوك اجتماعي - سياسي معروف ، ونقصد بهذا السلوك
[السلوك الليبرالي]

والله كول اجتي فرقة الخشابة ، ودكوا وركصوا ... وخلص الدك والركص
وصعد الدكتور ((جيمس فاولر)) على منصة المسرح حتى يشكر الجماهير على فرحهم
وبدا يشرح شلون اكتشفوا هذا الجين هو والفريق مالته ، كال:

الافكار السياسية والاجتماعية ما تتأثر بس بالبيئة ، بل البايلوجيا الها دور جبير جداً بصقل الشخصية
يعني اذا جان اكو فرد عايش بنص عائلة دينية منغلقة متشددة وبمنطقة دينية منغلقة متشددة ، مو شرط يطلع متدين منغلق متشدد
والعكس صحيح ، اذا جان اكو شخص عايش بنص عائلة منفتحة فكرياً وبمنطقة منفتحة فكرياً ، مو شرح يطلع منفتح فكرياً

گام رجل وسأل الدكتور سؤال ، كال : دكتور دكتور بعد عمك ، اعرف ولد عراقي عايش ابغداد ، عائلته نصها بالحوزة العلمية ، وهو مو متدين ويدعو للتعايش حتى مع الضفادع ، يعني هذا مو شاذ عن القاعدة؟؟

الدكتور كف رداناته وجاوب : لا مو شاذ ، وهي اصلاً وين اكو قاعدة ؟؟

الرجل رجع سأل الدكتور : دكتور لعد شلون عرفتوا هذا الجين الليبرالي ؟ غير لكيتوا شذوذ؟

الدكتور كام يكفر دفن : لا عيني مو شذوذ ، السلوك الليبرالي بالفرد ينوجد عن طريق عاملين ، وهما : او ......... خل اسولفلك شلون اكتشفنه الجين

بالبداية جبنة 2000 شخص ، مابين ولد وبنية ، واخذنه خرائطهم الجينية
ودرسناها
بعدين سألناهم عن علاقاتهم بايام المراهقة ؟
يعني هل جانت مراهقتهم ((((نشطة)))) متنوعة ؟ هل تعرفوا على ناس يخالفونهم بالتوجهات والاراء ؟

بعد ما كملنه الاستبيان عن فترة المراهقة ، رجعنه للخريطة الجينية الخاصة بكل واحد بيهم ، لكينه فد امر غريب كللللش

لكينه جين اسمه (DRD4) وظيفته يستقبل الناقل العصبي (الدوبامين)
طبعاً الدوبامين مثل ماتعرفون هو ناقل عصبي يؤثر بعمليات الدماغ الي تسيطر على الحركة والاستجابة العاطفية، والقدرة على تجربة المتعة والألم

الجين (DRD4) الموجود بالدوبامين
شكله يتشابه بكل ذولة الي سألناهم عن علاقاتهم المتنوعة بايام المراهقة واجابوا بـ : نعم ، كانت لدينا علاقات متنوعة كثيرة ايام المراهقة

فصار عدنه ربط بين حاملين هذا الجين ، وبين علاقات الحاملين لهذا الجين بالمجتمع
يعني العاملين الي تستند عليها ليبرالية الفرد هما :
1- العلاقات النشطة ايام المراهقة
2- جين مستقبل للدوبامين اسمه (DRD4)

و أستنتج من هذا الحجي كله أن البيئة الاجتماعية و المؤسساتية متكدر أن تفسر تماما المواقف السياسية و معتقدات شخص
ودور الجينات لازم أن يؤخذ بعين الاعتبار
بأختصار : "هذي النتائج تكول ان الانتماء السياسي والديني مايتعلق بس بالبيئة الاجتماعية الي الإنسان يفتح عينه عليها"

طبعاً احنه نتمنى ان يجون علماء آخرين ويبدون باكتشاف التفاعلات الممكنة بين الطبيعة البيولوجية و المؤثرات البيئية

يكوم نفس الرجل الي خلّه الدكتور فاولر يكفر دفن :
دكتور سؤال ... يعني اذا طلع واحد بعشيرتنه بي هذا الجين الليبرالي مانكسر عصّاته من العشيرة؟؟

الدكتور يشير الى عامل الـ DJ ، وعامل الـDJ يقوم بتشغيل اغنية :
يعراق ترجع شي اكيد بحيلك !!!

الدكتور يفر ايدة وينزل من المسرح
~.~.~.~.~.~.~.~.~.~.~.~

مصادر ليبرالية ماسونية كافرة
1- جامعة كاليفورنيا سان دييغو http://bit.ly/1Lp5OeC
2- مجلة الـ sciencedaily العظيمة http://bit.ly/1BMh5Uy
3- حتى جريدة واشنطن بوست هم ناشرة عن هذا الخبر
الفرق الجيني بين المحافظين والليبراليين http://wapo.st/1aJXzLH

‫#‏ليبرالي_لاتكلمني‬