‫#‏نظريات_غيّرت_صورة_الكوكب‬ / نظرية الالعاب ... بالعراقي

حياتنا على شنو تقوم ؟
خوالنا [المناطقة] گالوا ان الحياة بصورة عامة تعتمد وتمشي على ثنائيات بديهية
ثنائيات نشوفها بحياتنا اليومية وبصورة مباشرة
الموت , الحياة
الربح , الخسارة
النوم , الاستيقاظ
المرض , التداوي
الخ الخ الخ

بعد ما بدأ العلم يخوض بغمار كل الاشياء والمدركات , اقحم نفسه وبكل جرأة داخل هاي الثنائيات , وقدم نفسه كحلّال مشاكل (واهلية يشتغل يخرب بيتي)

عام 1944 , ثنين من جامعة بيرنستون الامريكية اسسوا علم اسموه
علم الالعاب
اسم :جون فون نيومان و أوسكار مورغن شتيرن
جون فون نيومان اله كان الحصة الاكبر من انشاء النظرية طبعاً

هاي النظرية شنو مفاهيمها؟ وشنو مسلّماتها؟ وشنو تقسيماتها ؟
قبل لانسولف عن هاي الحبشكلات احب انوه ان مفردة "العاب" لا تعني العاب رياضية او العاب الكترونية او اي فهم يُعنى بالحركة
المعنى من مفردة العاب هو وجود مواقف تصير بين شخص ونفسه , او بين شخصين او شخص مقابل مجتمع

بالنسبة للمفاهيم
يجي جون فون يكول : لابد من وجود موقف معين بي لاعبين على الاقل , ويتم اتخاذ قرار حول هذا الموقف
حلو

بالنسبة لمسلّمات النظرية
التسليم الاول : الطرفين يريدون الفوز
التسليم الثاني : الطرفين عدهم فد استراتيجية معينة من خلالها يكدرون يتوقعون تحركات بعضهم (بالضبط شلون لعبة الدومنة من تحسب شكو بيد صاحبك وتفتحله دو او جهار حتى لا يكعد)

بالنسبة لتقسيمات النظرية
التقسيم الاول
a- لعبة ساكنة : هنا , اللاعبين يقدمون فكرتهم او حركتهم بنفس اللحظة , يعني ماتنتظر صاحبك يقدم العنده وانت تجي وراه تقدم العندك
بصورة ادق (ضربة الجزاء , اللاعب يختار جهة حتى يسدد والگولچي يختار جهة حتى يصد , وبنفس لحظة التسديد اثنينهم ينفذون قرارهم )

b- لعبة متحركة : يمكن للواعيب ان يتخذون قراراتهم واحد ورة الثاني (لعبة الشطرنج مولاي)

التقسيم الثاني
a- لعبة بمعلومات كاملة : يعني شلون هاي ؟ يعني الطرفين الي ديلعبون كل واحد منهم يعرف نية المقابل بخصوص اللعبة
بصورة اسهل (لعبة العراق وداعش , العراق يعرف نية داعش الرئيسية وهي احتلال العراق بالكامل , وداعش تعرف نية العراق والي تحرير اراضيها من داعش بالكامل)

b- لعبة منقوصة المعلومات : هاي شنو سالفتها ؟ هاي سالفتها تعني ان اكو لاعب باللعبة ميعرف نوايا المنافس
بصورة اسهل (اني مثلاً , ما اعرف شرح يصير بعد ما تنتهي الحرب وية داعش)

اكو مثال كلش حلو حول تقسيمات هاي النظرية تلكوه بهذا الرابط الحمبليسي
اسم المثال : معضلة السجين
http://bit.ly/1DINxXt

بعد شكو بالنظرية ؟ ها , النظرية تحجي عن الحركة
تكول : الحركة هي الي تنقل اللعبة من مرحلة إلى أخرى , وتبدي الحركة من المرحلة الأولى وتنتهي بالمرحلة الأخيرة ، والحركة يمكن تنتقل من لاعب إلى آخر بشكل محدد ومتتابع أو سوية "وناركيلة"

والنظرية ترصد النتيجة هم , تكول : النتيجة هو مصطلح لنظرية الألعاب يدل على محصلة نهاية اللعبة او ماذا حدث في نهاية اللعبة (تنطي عدد لخسارة او الربح)

النظرية بقت على هالحطّة , ودخلت بمجالات هواية دخلت بالحروب ودخلت بمجال الصناعة والاقتصاد والزراعة والجغرافية والتوزيع السكاني والانظمة الرقمية

الى ان اجه خبل من المخابيل اسمه جون ناش
وقدم صورة جديدة لنظرية الالعاب مال جون فون نيومان
هذا كال ,,,, ليش دائماً اكو ربح وخسارة ؟ ليش مو الاثنين يفوزون ؟ او الاثنين يتوصلون لاقل قيمة خسارة وقيمة ربح متوسطة ؟ يعني الزلمة قدم معطى اخلاقي لنبذ الطمع (يمّه فدوة لعقله الجميل)

جون ناش كتب معادلة , من يجي الواحد يقرا هاي المعادلة , يلكه ان الأطراف الموجودة بهالمعادلة ما تتجه لاجل الفوز والحصول على الربح العالي , لا , بل كل طرف يتجه من واقع القناعة للفوز بتقدير متوسط

اكتبلكم المثال الي افتهمته من الفلم اليحجي عن قصة حياته , اسم الفلم
( A Beautiful Mind) واكيد معظمكم شايفه

المثال : يگلك اكو اربع زلم , وخمس نثاية
نثية من هاي النثاية صاكة للحمزة الشرجي , وبقية النثاية متوسطات الجمال
هنا شلون رح تتحقق معادلة ناش ؟
يكول عمو ناش : الغريزة عند الزلم رح تشتغل بقوة حتى ينالون على الحاتة الصاكة
ومن خلال تفعيل غريزة الزلم رح تحصل هاي البنية على اعلى فرص الاختيار من الزلم المستوية على الزواج
بهاي الحالة , اي شخص رح تختاره هاي البنية يعني خسارة للثلاثة الباقين
والسالفة الاكبر , ان البنات الاربعة البقن يمكن ميختارن اي واحد من ذولة التلاثة الخسروا , لان يكولون : هذولة يدورون حلوات بس , ومعناها رح يدورون ورانا اذا تزوجونه

الحل شنو ؟
كال الحل بيد اللاعبين , ويقصد الزلم
الحل ان الزلم يتجنبون الزواج من الصاكة , لأن احتمالات الخسارة وياها اكبر من احتمالات الخسارة وية متوسطات الجمال , واحتمال الفوز بالزواج من متوسطات الجمال اكبر من الفوز من الصاكة

المحصلة : الي يريد يتوصل لنتيجة مضمونة ومنطقية , لازم يتخلى عن طمعه وجشعه , ويشيل من باله فكرة الحصول على اكبر ناتج , ويرضه بالناتج المتوسط

وبعد عنده معادلة لخ اسمها (معادلة ناش في حروب الاسعار) هاي مو كلش مفتهمها , رح اكتب الي افتهمته منها بالتعليقات

مصادر عن النظرية :
http://bit.ly/1GEiEBo
هذا من الموقع الرسمي لنظرية الالعاب
http://bit.ly/1Ic1YSI
وهذا بحث بعنوان (نظرية الالعاب والتفاعلات الجتماعية)
http://bit.ly/1BjoUd4
وهذا وثائقي اسمه (القوانين الجديدة للعالم)
آآآآآآآآآآآآخ لو بس بي ترجمة , المعلومات البي تغني عن هواية كتب
https://www.youtube.com/watch?v=1uW1qJoWYPg

والمشايف فلم A Beautiful Mind خل يشوفه