‫#‏نظريات_غيّرت_صورة_الكوكب‬ / احتراق الاوكسجين ... بالعراقي

هذولة اجدادنا العظماء [انسان الغاب , انسان الكهف , النايدرتال] مساكين بشرفي
هذولة عاشوا ببيئات حادة , وطبيعة قاسية جداً , كضوها ركض بركض وتختّل من اي حدث يواجههم

بيئتهم چانت جبلية , وبيئة غابات , وما عدهم شي يتوقفون عنده فكرياً
سوى مسألة : شلون احافظ على نفسي , وشلون اجيب مواچيل حتى ما اموت من الجوع , وشلون اخلّف

معظم الظواهر الي جانت تواجههم ميديرولها بال , ولا يحاولون يفكرون بيها , من مطر , لعواصف , لبراكين .... الخ

ظاهرة من هاي الظواهر الي جانت تواجههم , هي ظاهرة الصواعق الي تضرب الغابات وتسبب حرائق
بعد ان تنزل الصاعقة , يصير حريق , هذا الحريق اكيد المادة مالته هي النار
الجماعة ببادئ الامر خافوا من النار ومتقربلوها
الاحساس بالحرارة + عدم وجود فضول معرفي = خوف شديد (هذا تحليلي)

بمرور الوقت , وبسبب "الانتخاب الطبيعي" دام ثراه , كدر احد اجدادنا ان يوكف على مقربة من النار من اجل التعرف عليها , ونجح باخذ شعلة , ووراها تطورت العملية بعد ان ادركوا شلون يتعاملون وياها , بحيث كدروا يوجدوها عن طريق الاحتكاك او الطَرقْ

مشت الايام والسنين والقرون , ووصلت النار وفعالية الاحتراق للحضارات
ومن ضمن الحضارات الوصلتلها النار , حضارة خوالنا الاغريق
الاغريق حضارة صاكة حيل , اصحاب منهج تجريبي يعني
حاولوا يعرفون ماهية النار والاحتراق بس مكدروا , ولذلك افترضوا ان اكو شي ينبعث من المادة يساهم بعملية الاحتراق بس ما كدروا يسموه

وهم مشت الايام والسنين والقرون , ووصلت الوادم للقرن السابع عشر
واجه ضلع من الضلوع اسمه "جورج شتال" وقدم نظرية اسمها نظرية الفلوجستون

نظرية الفلوجستون تنص على ان المادة بيها محتوى اسمه الفلوجستون
هذا المحتوى متفاوت بين مادة واخرى , وهو الي يساهم باحتراق المادة وتحولها من مادة الى مادة اخرى

يعني ان المواد الي تحتوي على كميات چبيرة من عنصر الفلوجستون تكون سريعة الاشتعال وما تخلّف من احتراقها رماد هواية
وفسرت هذي النظرية تحول المعادن الى كلس (اوكسيد) من تتسخن بالهواء
كالوا ان المادة تفقد الفلوجستون وتتحول الى اوكسيد وفقا للمادلة التالية :
معدن - فلوجستون = كلس او (اوكسيد)

وفسرت هذي النظرية شلون نستخلص المعادن من الخامة الرئيسية مالتها
كالوا : عن طريق تسخين الخامة وية مركب يسموه الفحم النباتي
من يسخنون الفحم الغني بالفلوجستون مع كلس (اوكسيد)
فان الفحم يرسل كل الفلوجستون مالته للكلس ، فيتحول هذا الكلس الى معدن وفقا للمعادلة التالية :
كلس + فحم نباتي (غني بالفلوجستون ) = معدن
وهذا رابط حلو عن الفلوجستون باسم : الفلوجستون مادة الاحتراق
كلماته مو كلش صعبة تكدرون تترجموها بكوكل
http://www.theguardian.com/…/m…/15/research.highereducation1

ضلّت هاي النظرية بالمجتمع العلمي لفترة , وكل العلماء ما مرتاحيلها
يحسون اكو شي غلط بهذا التفسير
شنو اكو مادة بنص مادة تساهم بعملية التحول اثناء الاحتراق ؟ وين اكو هيج بطة تلعب بلي 3؟

الى ان اجه كبد من الاكباد اسمه انطوان لافوازيه , هذا داهية عقلية ما جابته ولّادة
طبعاً يقال هو اول من اكتشف الاوكسجين عن طريق فصل جزيئاته عن الماء

لافوازيه صفن على الاحتراق صفنة طويلة يخرب بيتي , وتوصل لتفسير اكثر عمقاً من تفسير شتال

كال لافوازيه : الهواء من شنو يتكون ؟ يتكون من مجموعة غازات والاوكسجين على راس هاي الغازات
اذا تفاعلت الحرارة "النار" مع العناصر الفلزية بالهواء , فراح تتحد هذي الفلزات مع جزء من الهواء والي هو الاوكسجين مما يؤدي الى زيادة بوزن الفلز

وهنا اثبت لافوازيه , ان ماكو اي شي اسمه فلوجستون ينضاف او ينفقد بعملية الاحتراق , لأن ماكو اي فقدان لوزن المعدن عند تسخينه
واثبت هذا الشي من خلال تفاعل الزئبق وية الاوكسجين بهاي المعادلة

زئبق + اوكسجين = اوكسيد الزئبق

وبهذا الاكتشاف العظيم , توصلوا علماء بعد لافوازيه الى نظريات تطوير الكيمياء الحياتية والعضوية ومن اهم النظريات هي : نظرية دالتون ونظرية تومسون

وهذا وثائقي كلش حلو يتحدث عن اهم 100 اكتشاف للانسان بعلم الكيمياء على طول الخط الزمني بحياة الانسان
https://www.youtube.com/watch?v=Rx9UYyY2jsU