‫#‏نظريات_غيّرت_صورة_الكوكب‬ / نظرية الملعومات .... بالعراقي

افرض مسلاً مسلاً يعني
ان حضرة جنابي وحضرة جنابك عايشين وية خوالنا الضلوع (النايدرتال وانسان الغاب) قبل عشرات الالآف من السنين
وحبيت اكلّك : خلي نطلع نصيد ,, شلون رح اوصلّك هاي الجملة بوكتها وماكو لغة بيناتنا؟؟

رح ارسملك على المهجوم مالتنا (الكهف) صورتي وصورتك , واني وانت لازمين بيدينا رماح وناچخيه برگبة حيوان
انت رح تفهم انه اني اريد اكلّك امشي نطلع نصيد , من خلال الصورة
يعني شنو معنى هالحجي : معناها خلقت وسط "تواصل" بيني وبينك

ظهر اعظم اختراع بالعالم كله , وهو الحروف الابجدية (واقصد حروف كل اللغات الابجدية مو بس العربية)
من خلاله كدرنه اني وياك , وانتِ وياها نتواصل عن طريق تراكيب ساحرة
اسمها : الجملة الصوتية , الجملة الموسيقية , الجملة الفنية الخ

بس اوكف بعد عمك !!! هذا التركيب هو اصلاً عبارة عن شنو ؟؟
عبارة عن معلومات
وتعريف المعلومات هو : "ما يُسمعُ لعقلٍ يؤثر على عقلٍ آخر "

هذا التركيب عبارة معلومات , معلومات نابعة من معلومات
هاي شلون ؟

الانسان مثلاً مو يصدر منه صوت بشكل : كلام , اغنية , صراخ الخ
هذا الصدور يعتبر معلومات , طالعة من معلومات الي هي "الانسان"
اي نعم مولاي , الانسان هو عبارة خريطة كبيرة من المعلومات موجودة بهارد بايلوجي اسمه DNA , من خلاله نكدر نتعرف على معلومات الانسان

فـــ , هذا معنى (معلومات نابعة من معلومات)

من اللغة وماهيتها , وشلون نقوي ونسهل قابلية التواصل بيناتنا احنه البشر
انبثقت (نظرية المعلومات)
لهنا حلو

كال كلود شانون (ابو نظرية الملعومات)
ان المعلومات حتى تنتقل من وسط الى اخر , لازم يكون الها "وزن" ؟؟
شلون مولاي ؟ شنو يعني وزن للمعلومة ؟
ترة المعلومة مو كتلة حتى يكون الها وزن !!

هو مو وزن بالمعنى الفيزيائي المتعارف عليه , هو نوع من الترميز متفكك من المعلومة سمّو العلماء (بت او bit)
وكل معلومة الها قياس خاص من البتات , يعرفوا العالم عن طريق الميزان

هذا الميزان اسمه إنتروبية المعلومات
انتروبية المعلومات يعني : قياس عدد البتّات الموجود بالمعلومة الوحدة

اجه كلود شانون , كال : بما انه احنه مستخدمين اللغة الانكليزية
وهي لغة العلوم الي عليها اجماع , فرح اخلي قالب لهاي اللغة اكدر من خلالها افكك المعلومات التصدر منها

فكال , الاحرف الانكليزية هي 26 حرف , فاني شنو اليمنعني من قول : ان هاي الاحرف تقابلها ارقام تنكتب بصيغة تصاعدية من 0 للـ 25؟؟

يعني ال c = 2 , b = 1 , a = 0 الى ان نوصل z = 25
وابدي من هاي السالفة اعرف انتروبية اي معلومة

من خلال هاي الفيكة التحشيشية , انبنى مفهوم الانتروبية المعلوماتية
يعني تجيك كلمة تكدر من خلال ارقامها الي تقابل الحروف تعرف الانتروبية مالتها وبالتالي عرفت وزنها , ومن عرفت وزنها فراح تعرف شنو الوسط الي تحتاجه , وشنو المرسلات والمستقبلات الي من خلالهن تصنع التواصل

اني ما اريد اطول عليكم وداعة امي , هاي هيج مجرد خطوط عريضة للنظرية ولافكارها
اما نجاحات هاي النظرية فما تتسولف , لان اذا ذكرت سالفة ونسيت سالفة فمعناها اكطع اشتراك الانترنيت , بأختصار , هاي النظرية هي النظرية الي تقوم عليها كل انظمة الحواسيب والشبكات والانترنيت بالعااااااااااااااااااااااااااااالم

هاي مصادر لطيفة عن هاي النظرية العظيمة الي من خلالها اني دا اكتب هذا البوست من على هذي الحاسبة , ولما هذي النظرية جان هسه احنه لحد الان نسمع علي محمود العيساوي او عادل عكلة مثلاً grin emoticon

شكراً كلود شانون
شكراً آلان تيرنينغ

http://www-ee.stanford.edu/~gray/it.pdf
http://en.wikipedia.org/wiki/Entropy_(information_theory)
فديو رائع
https://www.youtube.com/watch?v=JnJq3Py0dyM
ويكيبيديا , عربي وكلشي متفتهم منه
http://bit.ly/1x2EwGh

وهذا كتاب رائع ومبسط جداً , اسمه : مقدمة نظرية المعلومات , الرموز والاشارات
http://bit.ly/1BRFOmD